Congress on Sunburn: दक्षिण गोव्यात कदापी सनबर्न होऊ देणार नाही!

Goa Sunburn:

वेगवेगळ्‍या कारणांसाठी वादग्रस्‍त ठरलेला ‘सनबर्न फेस्टिव्हल’ यंदा दक्षिण गोव्‍यात आयोजित करणार, असे या महोत्‍सवाच्‍या आयोजकांनी जाहीर केल्‍यामुळे दक्षिण गोव्‍यातील लाेकांमध्‍ये तीव्र संतापाचे वातावरण पसरले आहे. आयोजकांनी फेस्टिव्‍हलची जागा निश्‍चित केलेली नाही. कॉंग्रेस पक्ष आणि विराेधी पक्षनेते युरी आलेमाव यांनी उत्तर गोव्‍यात फाेफावलेली ड्रग्‍स संस्‍कृती आता दक्षिण गोव्‍यात आणण्‍याचा हा प्रयत्‍न आहे, अशी टीका केली आहे. उत्तर गोव्याचे ड्रग्स आणि गुन्हेगारी स्थळामध्ये रूपांतर केल्यानंतर आता मुख्यमंत्री डॉ. प्रमोद सावंत आणि पर्यटनमंत्री रोहन खंवटे यांच्या नेतृत्वाखालील भाजप सरकारने दक्षिण गोव्यावर वक्रदृष्टी फिरविली आहे. लोकसभेच्या पराभवाचा बदला घेण्याचा प्रयत्न भाजपने केला आहे, अशी कोपरखळी युरी आलेमाव यांनी हाणली.