Goa Cabinet Reshuffle: मंत्री रमेश तवडकर यांनी स्वीकारला पदभार, खातेवाटप होणार जाहीर

पणजी: गेल्या काही दिवसांपासून प्रलंबित असलेले गोव्याच्या मंत्रिमंडळाचे खातेवाटप सोमवारी (दि.२६) जाहीर होण्याची शक्यता आहे. नव्याने मंत्री झालेल्या रमेश तवडकर यांनी आपल्या मंत्रिपदाचा पदभार स्वीकारला. खातेवाटप 'अमावास्या' आणि आठवड्याच्या सुट्ट्यांमुळे रखडले होते. मात्र, संध्याकाळपर्यंत यासंबंधीची घोषणा केली जाईल, असे तवडकर यांनी स्पष्ट केले.

राज्याच्या राजकारणात गेल्या अनेक दिवसांपासून खातेवाटपाची चर्चा सुरू होती. रमेश तवडकर आणि दिगंबर कामत यांचा मंत्रिमंडळात समावेश झाल्याने, मुख्यमंत्र्यांकडील काही महत्त्वाची खाती त्यांना दिली जाण्याची शक्यता वर्तवली जात आहे. तवडकर यांनी पदभार स्वीकारताच ते लवकरच आपल्या नवीन खात्याच्या कामाला सुरुवात करतील. यामुळे राज्याच्या प्रशासकीय कामकाजाला गती मिळण्याची अपेक्षा आहे.