Garbage Plant Visit: विद्यार्थ्यांनी केला 'कचरामुक्तीचा' संकल्प! राणे हायस्कूलची डिचोली प्रकल्पाला भेट
Garbage Plant Visit
डिचोली: कुडचिरे येथील सेकंड लेफ्टनंट जे. जे. राणे सरकारी हायस्कूलच्या विद्यार्थ्यांनी डिचोली पालिकेच्या लाखेरे येथील कचरा प्रक्रिया प्रकल्पाला भेट दिली. विद्यार्थ्यांनी कचऱ्यावरील प्रक्रियेविषयी माहिती जाणून घेतल्यानंतर कचरामुक्तीचा संकल्प केला. अभ्यासाचा एक भाग म्हणून शिक्षिका चेताली परब, बाबल मांद्रेकर आणि प्रभाकर पेडणेकर यांच्या मार्गदर्शनाखाली हा उपक्रम राबविण्यात आला. कचरा प्रक्रिया प्रकल्पात कचरा व्यवस्थापन कसे करतात, त्याबाबत विद्यार्थ्यांनी माहिती जाणून घेतली.
प्लास्टिकचा वापर टाळा
दिवसेंदिवस कचऱ्याची समस्या गंभीर बनत चालली आहे. लहानसहान चुकांमुळे ती आणखी उग्र बनत आहे, असे स्वच्छतादूत राजेंद्र सावईकर यांनी सांगून प्रत्येकाने प्लास्टिकचा वापर टाळावा, आपला परिसर स्वच्छ ठेवावा, असे आवाहन केले. विश्‍‍वनाथ नाटेकर आणि विजयकुमार नाटेकर यांनीही मार्गदर्शन केले. शिक्षिका चेताली परब यांनी कचऱ्याची समस्या निर्माण कशी होते आणि ती कशी टाळता येते, त्याची प्रात्यक्षिक माहिती विद्यार्थ्यांना मिळावी या हेतूने कचरा प्रकल्पाला भेट देण्यात आल्याचे सांगितले.
कचरा प्रकल्पस्थळी उभारण्यात आलेल्या बायो-मिथानेशन प्रकल्पाचीही विद्यार्थ्यांनी पाहणी केली. ओल्या कचऱ्यावर प्रक्रिया केल्यानंतर या प्रकल्पात बायो गॅस तयार कसा होतो?, बायो गॅसवर वीजनिर्मिती कशी होते? याबाबत विजयकुमार नाटेकर यांनी विद्यार्थ्यांना मार्गदर्शन केले.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.