Mapusa News: केळ्यांवर विषारी रसायनांची फवारणी! म्हापश्यात नऊ क्विंटल साठा जप्त

Mapusa FDA Raid On Banana Seller

म्हापसा: येथील मार्केट सबयार्डमध्ये अन्न व औषध प्रशासनाने छापा टाकून ‘इथापोन’ या रसायनाद्वारे केळी पिकवणाऱ्या दुकानदाराला रंगेहात पकडले आणि त्याच्याकडून ९ क्विंटल केळी जप्त केली. ही कारवाई सकाळी अन्न व औषधे प्रशासनाच्या पथकाने केली. म्हापसा मार्केट यार्डमध्ये प्रशासनाचे अधिकारी नियमित पाहणी करीत होते. तेव्हा हा दुकानदार केळीवर ‘इथापोन’ या रसायनाची फवारणी करत असल्याचे आढळून आले.

लगेच पथकाने या दुकानावर छापा टाकला आणि केळीचे नमुने घेतले. संशयित असिफुल्ला हजरत अली करगुटली याने दुकानातील सर्वच केळी रसायनाचा वापर करून पिकविल्याचे चौकशीत आढळून आले. या दुकानातील एकूण ९ क्विंटल केळी पथकाने जप्त केली. त्यानंतर या मालाची म्हापसा पालिकेच्या साहाय्याने विल्हेवाट लावली.