Curti Fire News: कुर्टी येथे एमआरएफ कंपनीच्या गोदामाला आग; दीपनगर परिसरात धुराचे लोट

फोंडा येथील दीपनगर-कुर्टी भागात असलेल्या एमआरएफ (MRF) कंपनीच्या एका शेडला भीषण आग लागल्याची घटना घडली आहे. या आगीमुळे परिसरात धुराचे लोट पसरले असून मोठी खळबळ उडाली आहे. घटनेची माहिती मिळताच फोंडा आणि आसपासच्या अग्निशमन दलाच्या गाड्या तातडीने घटनास्थळी दाखल झाल्या.

शे़डमध्ये टायर आणि रबरसारख्या ज्वालाग्रही वस्तू असल्याने आगीने रौद्र रूप धारण केले होते. अग्निशमन दलाच्या जवानांनी शर्थीचे प्रयत्न करून आगीवर नियंत्रण मिळवण्याचा प्रयत्न केला. या आगीत मोठ्या प्रमाणावर वित्तहानी झाल्याची शक्यता वर्तवण्यात येत आहे. सुदैवाने, अद्याप कोणतीही जीवितहानी झाल्याचे वृत्त नाही. आगीचे नेमके कारण अद्याप समजू शकलेले नाही.