Bicholim Bus Stand: एप्रिलमध्ये डिचोली बसस्थानकाचे होणार लोकार्पण

डिचोली: पालिका निवडणुकीपूर्वी म्हणजेच येत्या एप्रिल महिन्यात डिचोलीच्या बहुप्रतीक्षित बसस्थानकाचे लोकार्पण करण्यात येईल, अशी ग्वाही कळंगुटचे आमदार तथा गोवा राज्य साधनसुविधा विकास महामंडळाचे (जीएसआयडीसी) अध्यक्ष मायकल लोबो यांनी दिली. सोमवारी त्यांनी डिचोली बसस्थानकाच्या कामाची पाहणी करून पत्रकारांशी संवाद साधला.

बसस्थानकाच्या उद्‌घाटनानंतर प्रकल्पाच्या दुसऱ्या टप्प्यातील कामास सुरवात करण्यात येईल, असे स्पष्ट करत शहरातील प्रलंबित मॉडर्न फायर स्टेशनसह अन्य विकास प्रकल्प लवकर पूर्ण करण्यासाठी प्रयत्न सुरू असल्याचे मायकल लोबो यांनी सांगितले. सध्या सुरू असलेल्या कामाबाबत त्यांनी समाधान व्यक्त केले.