बोरी: हजारो दिवजांच्या मंद प्रकाशातील लखलखाटात बोरी नवदुर्गा देवीचा परिसर गुरुवार, ६ रोजी तेजाळून गेला होता. हजारो सुवासिनींनी नऊवारी लुगडी नेसून दागदागिने घालून आणि सुवासिक फुलांच्या फात्या माळून देवी नवदुर्गेच्या कार्तिक त्रिपुरारी पौर्णिमा जत्रोत्सवातील दीपोत्सव जल्लोषात साजरा केला. या जत्रोत्सवानिमित्त राज्याबरोबरच शेजारच्या राज्यातील भाविकांनीही भाग घेऊन देवीचा नवस फेडला व नवस बोलण्यासाठी गर्दी केली होती.
राज्यातील या पहिल्या जत्रोत्सवानिमित्त सकाळी श्री नवदुर्गा देवी, श्री कमळेश्‍वर, श्री ग्रामपुरुष आदी पंचिष्ट दैवतांना विधिपूर्वक अभिषेक, पूजा-अर्चा झाली. अजित देवारी यांनी देवीची मूर्ती पाच रूपाने आकर्षकरीत्या सजवली होती. सकाळी श्रींचे तरंग सजवून अवसारी तरंगाचे आगमन तळयेवाडा-बोरी येथील श्री नारायणदेवाच्या मंदिरात आले. याठिकाणी पूर्वापार पद्धतीने धार्मिक विधी झाल्यावर तरंगाचे श्री नवदुर्गा मंदिरात वाजतगाजत आगमन झाल्यावर हजारो सुवासिनींनी हातात दिवजा पेटवून श्री नवदुर्गेची आणि तरंगाची ओवाळणी केली. या वार्षिक जत्रौत्सवात दिवजोत्सवात भाग घेण्यासाठी विविध भागात राहणाऱ्या देवीच्या कुळाव्यांच्या सुहासिनींनी भाग घेतला होता. या जत्रौत्सवानिमित्त खाजे, लाडू व अन्य पदार्थांची व अनेक तऱ्हेच्या वस्तूंची मोठी फेरी भरली होती.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.