Borim Bridge: बोरी पुलावरील वाहतुकीस अखेर प्रारंभ Video

फोंडा: फोंडा आणि मडगाव जोडणाऱ्या दक्षिण गोव्यातील महत्त्वाच्या ठरलेल्या बोरी पुलावरील रस्ताकाम सोमवारी पहाटे पाचच्या सुमारास पूर्ण झाल्यानंतर वाहतूक सुरू करण्यात आली. हा पूल दुरुस्तीसाठी रविवारी ८ रोजी रात्री आठ ते सोमवार, ९ रोजी सकाळी आठपर्यंत वाहतुकीस बंद राहिल, असे जाहीर केले होते, पण नियोजित वेळेपूर्वीच काम पूर्ण झाल्यामुळे वाहतूक सुरू करण्यात आली.

पुलाच्या रस्ते दुरुस्तीसाठी मुंबई येथून खास ‘पॉलिमर मोडिफाय हॉटमिक्स’ डांबर आणण्यात आले होते, हे काम रात्री सुरू केल्यानंतर अडथळ्याविना पूर्ण करण्यात आल्याची माहिती साबांखाचे सहायक अभियंता आनंद वाघुर्मेकर यांनी दिली. बोरी पूल वाहतुकीसाठी बंद ठेवण्यात आल्यानंतर दुर्भाट - रासई तसेच राशोल - शिरोडा जलमार्गावर फेरीबोटींची संख्या वाढवली होती, रात्रभर ही वाहतूक सुरू होती. काहींनी मडगावहून फोंडा गाठण्यासाठी पणजी मार्गाचा अवलंब केला. पोलिस, नदी परवहन खात्याने उत्तम सहकार्य दिल्याचे आनंद वाघुर्मेकर यांनी नमूद केले.