Bicholim: डिचोलीत दिवसाढवळ्या इमारतीचे गेट तोडताना परप्रांतीय युवकाला पकडले

डिचोली: डिचोलीच्या भर बाजारात एका इमारतीत दिवसाढवळ्या संशयास्पदरीत्या वावरणाऱ्या एका युवकाला लोकांनी पकडून पोलिसांच्या ताब्यात दिले. पोलिसांच्या ताब्यात देण्यापूर्वी लोकांनी या युवकाची यथेच्छ धुलाई केल्याची माहिती मिळाली आहे.

हा युवक एका इमारतीची गेट तोडत होता. त्यावेळी त्याला रंगेहाथ पकडल्याने तो चोरी करण्याच्या उद्देशाने आला असावा, असा संशय वर्तविण्यात येत आहे. पोलिस त्यादृष्टीने तपास करीत आहेत. हा युवक परप्रांतीय असल्याची माहिती मिळाली आहे.

मिळालेल्या माहितीनुसार, हा संशयित युवक आज सायंकाळी बाजारातील छत्रपती शिवाजी महाराज संकुल इमारतीच्या मागच्या बाजूने असलेल्या ‘संकल्प गार्डन’ इमारतीच्या तिसऱ्या मजल्यावर आला होता.