Goa Politics: 'आप'चा लोकाभिमुख जाहीरनामा! प्रत्येक मतदारसंघांत मतदारांशी संवाद - वेन्झी व्हिएगस

मडगाव: डिसेंबर महिन्यात होणाऱ्या गोव्यातील जिल्हा पंचायत निवडणुकीत आम आदमी पार्टी प्रत्येक मतदारसंघात मतदारांसमवेत बैठक घेऊन त्यांना हवा असलेला जाहीरनामा तयार करणार आहोत, अशी माहिती ‘आप’चे बाणावलीचे आमदार वेन्झी व्हिएगस यांनी दिली.

आज मडगाव येथे घेतलेल्या पत्रकार परिषदेत त्यांनी ही माहिती दिली. यावेळी त्‍यांच्‍याबरोबर जिल्‍हा पंचायत निवडणुकीसाठी जाहीर करण्‍यात आलेले बाणावलीचे उमेदवार जोजफ पिमेंता, वेळ्‍ळीच्‍या उमेदवार इसाका फर्नांडिस तसेच कोलवाचे उमेदवार आंतोनियो फर्नांडिस हे उपस्‍थित होते.

असा जाहीरनामा करण्‍यासाठी बाणावली मतदारसंघात चार ठिकाणी अशा बैठका झाल्‍या असून ओडली, करमणे, सुरावली व कोलवा या ठिकाणी या बैठका झाल्‍या आहेत. या बैठकांमध्‍ये लोकांनी ज्‍या सूचना केल्‍या, त्‍या आम्‍ही लिहून घेतल्‍या असून या बाबी आम्‍ही स्‍थानिक जाहीरनाम्‍यात समाविष्‍ट करू, असे व्‍हिएगस यांनी सांगितले.

या उपक्रमाबद्दल बोलताना व्‍हिएगस म्‍हणाले, प्रत्‍येक मतदारसंघाचा जाहीरनामा बनवण्‍यासाठी मतदारसंघात जाऊन बैठका घेणार, स्थानिकांना जी कामे जिल्हा पंचायतींकडून होणे अपेक्षित आहेत त्‍याची यादी करून आम्‍ही जाहीरनामा तयार करणार.