Vijay Devarakonda: कोकणवासियांनो! विजय देवरकोंडा आलाय तुमच्या गावात, 'रावडी जनार्दन' कोकणच्या प्रेमात

Vijay Devarakonda Konkan Shoot: महाराष्ट्राचे निसर्गरम्य रत्न असलेले कोकण, आता पुन्हा एकदा चित्रपटसृष्टीचे आवडते ठिकाण बनलेय. निळाशार समुद्रकिनारा, नारळी-पोफळीच्या बागा, लाल माती आणि चिरेबंदी वाड्यांनी नटलेले कोकण, नेहमीच मराठी आणि हिंदी चित्रपटांच्या सौंदर्यात भर घालत आले आहे. मात्र, आता दक्षिण भारतीय सिनेसृष्टीही कोकणच्या प्रेमात पडली असून, सध्या 'रावडी जनार्दन' या साऊथ चित्रपटाचे भव्य चित्रीकरण कोकणातील सैतवडे गावात सुरू आहे.

सैतवडे गावात उभारला भव्य सेट

'रावडी जनार्दन' या चित्रपटाचे कथानक इ.स. १९०० मधील ब्रिटिश राजवटीच्या काळावर आधारित आहे. त्यामुळे त्या काळाचा अनुभव देण्यासाठी सैतवडे येथील 'द मॉडेल इंग्लिश स्कूल'च्या मैदानावर जिल्हाधिकारी कार्यालयाचा भव्य सेट उभारण्यात आला आहे.

आठवड्याभरापासून चित्रीकरण सुरू असल्याने सैतवडे गावात उत्साहाचे वातावरण आहे. गावकऱ्यांपासून ते शेजारच्या भागातील लोकही शूटिंग पाहण्यासाठी गर्दी करत आहेत. या चित्रपटातील अनेक दृश्ये समुद्रकिनाऱ्यावरही चित्रित केली जात आहेत. सैतवडे येथील चित्रीकरण पूर्ण झाल्यावर, पुढील शेड्यूल वरवडे गावात पार पडणार आहे.

कोकणचे 'सिनेमॅटिक' सौंदर्य

कोकणातील शांत, सुंदर आणि ऐतिहासिक वातावरण निर्मात्यांना अधिक आकर्षित करत आहे. अलीकडील काळात 'मुंजा', 'थ्री ऑफ अस' यांसारख्या बॉलिवूड चित्रपटांचे; तसेच 'उनाड', 'सुभेदार', 'शेरशिवराज', 'श्यामची आई', 'प्रीतम', 'पांघरुण' यांसारख्या अनेक मराठी चित्रपटांचे चित्रीकरण वेंगुर्ला, गुहागर, रत्नागिरी, दापोली, कणकवली, कुडाळ परिसरात झाले आहे. \

आता दक्षिण भारतीय निर्मात्यांचेही लक्ष कोकणाकडे वळल्यामुळे मराठी, हिंदी आणि साऊथ निर्माते शूटिंगच्या परवानगीसाठी रांगा लावत आहेत. कोकणात वाढलेले हे चित्रीकरण स्थानिक लोकांसाठी केवळ अभिमानाची बाब नाही, तर रोजगार आणि पर्यटन वाढीचे एक मोठे नवीन दालन ठरत आहे.