Ranbir Kapoor: ना नायक ना खलनायक 'लव्ह अँड वॉर' मध्ये अशी असणार रणबीर कपूरची भूमिका

Ranbir Kapoor: अ‍ॅनिमल चित्रपटात मुख्य भूमिका निभावलेला अभिनेता रणबीर कपूर या चित्रपटातील त्याच्या भूमिकेमुळे मोठ्या चर्चेत आहे. आता तो एका नव्या भूमिकेतून पुन्हा प्रेक्षकांचे मनोरंजन करण्यासाठी येत आहे. संजय लीला भन्साळी यांच्या लव्ह अँड वॉर या चित्रपटात तो दिसणार आहे.

यामध्ये त्याची पत्नी आलिया भट्ट आणि विकी कौशल देखील मुख्य भूमिकेत दिसणार आहेत. ही एक ॲक्शन लव्ह स्टोरी असेल, ज्यामध्ये उत्तम संगीताचीही जोड असणार आहे. आता अॅनिमल नंतर रणबीरचे पात्र कसे असणार याची उत्सुकता प्रेक्षकांना लागली होती. याबाबतदेखील मोठे अपडेटस समोर आले आहेत.

असे म्हटले जात आहे की, तो या चित्रपटात नायक किंवा खलनायक अशा कोणत्याही भूमिकेत असणार नाही. त्याचे पात्र ग्रे शेडमध्ये असेल. जे पूर्णत: चांगले किंवा वाईट असे म्हणता येणार नाही. आलिया आणि विकीच्या पात्रांमध्ये आव्हाने आहेत, पण भन्साळी अनेक वर्षांपासून अशा चेहऱ्याच्या शोधात होते, ज्यामध्ये नायकाची आणि खलनायकाची दोघांचीही झलक पाहायला मिळेल. आता रणबीर जवळ त्यांचा हा शोध थांबला असून दोघे १७ वर्षानंतर एकत्र काम करताना दिसणार आहेत.

संजय लीला भन्साळी आणि रणबीर कपूर यांनी 'सावरियां' चित्रपटात एकत्र काम केले आहे. या चित्रपटातून रणबीरने बॉलिवूडमध्ये प्रवेश केला. या चित्रपटात सोनम कपूर आणि राणी मुखर्जीही दिसल्या होत्या. हा चित्रपट प्रेक्षकांच्या खास पसंतीस उतरला नव्हता. मात्र त्यातील गाणी आणि रणबीर लोकप्रिय झाले. त्याचा 'तौलिया' सीन आजही लोक विसरलेले नाहीत.

आता लव्ह अँड वॉर हा चित्रपट पाहण्यासाठी प्रेक्षक उत्सुक असल्याचे सोशल मिडियावर पाहायला मिळत आहे. लवकरच शूटिंग सुरु होणार असून २०२५ मध्ये हा चित्रपट प्रेक्षकांच्या भेटीला येणार आहे.