Fight Video Viral: रणवीर सिंगचा स्वॅग पडला भारी! 'धुरंधर 2' मुळे चित्रपटगृहात तुफान राडा, प्रेक्षक आपसात भिडले; व्हिडिओ व्हायरल

Fight Breaks Out At Dhurandhar 2 Screening : बॉलीवूडचा सुपरस्टार रणवीर सिंग सध्या त्याच्या 'धुरंधर २: द रिव्हेंज' या चित्रपटामुळे बॉक्स ऑफिसवर अक्षरशः राज्य करत आहे. मात्र, पडद्यावरील हा थरार आता खऱ्या आयुष्यातही प्रेक्षकांच्या डोक्यात शिरल्याचे दिसत आहे. एका धक्कादायक घटनेत, चित्रपट पाहताना चाहत्यांमध्ये इतका वाद झाला की चक्क थिएटरचे रूपांतर आखाड्यात झाले. लाथा-बुक्क्यांनी एकमेकांना तुडवणाऱ्या चाहत्यांचा हा व्हिडिओ सध्या सोशल मीडियावर तुफान व्हायरल होत आहे.

नेमकं काय घडलं?

'धुरंधर २' मधील जबरदस्त ॲक्शन सीन्स पाहून प्रेक्षक आधीच भारावून गेले होते. मात्र, एका सिनेमागृहात चित्रपट सुरू असतानाच काही चाहत्यांमध्ये बाचाबाची सुरू झाली. सुरुवातीला खुर्चीवर बसून सुरू झालेला हा वाद काही वेळातच हातघाईवर आला. रागाच्या भरात हे तरुण एकमेकांच्या अंगावर धावून गेले. थिएटरमधील इतर प्रेक्षक शांत करण्याचा प्रयत्न करत होते, पण कुणीही कोणाचे ऐकण्याच्या मनस्थितीत नव्हते. या गोंधळामुळे चित्रपट पाहण्यासाठी आलेल्या कुटुंबियांमध्ये भीतीचे वातावरण पसरले आणि काहींनी तर भीतीपोटी थिएटरच्या बाहेर धाव घेतली.

सोशल मीडियावर व्हिडिओचा धुमाकूळ

सोशल मीडियावर व्हायरल होत असलेल्या या व्हिडिओमध्ये रणवीर सिंगच्या चाहत्यांमधील ही चकमक स्पष्टपणे दिसत आहे. रणवीर पडद्यावर 'जसकीरत सिंह रंगी' बनून आपल्या कुटुंबाचा बदला घेत असताना, खाली त्याचे चाहते मात्र स्वतःच ॲक्शन मोडमध्ये आले होते. हा व्हिडिओ नेमका कोणत्या शहरातला आहे हे अद्याप स्पष्ट झालेले नाही, पण अवघ्या काही तासांत याला हजारो लाईक्स मिळाले आहेत. युजर्स यावर "चित्रपटाचा प्रभाव जास्तच झालाय" अशा मजेशीर आणि काही प्रमाणात संतापजनक कमेंट्स करत आहेत.

बॉक्स ऑफिसवर १००० कोटींचा ऐतिहासिक टप्पा

एकीकडे थिएटरमधील गोंधळाची चर्चा असताना, दुसरीकडे 'धुरंधर २' ने कमाईचे सर्व विक्रम मोडीत काढले आहेत. आदित्य धर यांच्या दिग्दर्शनाखाली बनलेल्या या चित्रपटाने अवघ्या ८ दिवसांत जगभरात १००० कोटी रुपयांचा टप्पा ओलांडला आहे. २०२६ सालातील हा सर्वात यशस्वी चित्रपट ठरला असून रणवीर सिंगच्या अभिनयाचे सर्व स्तरांतून कौतुक होत आहे. मात्र, अशा प्रकारच्या हिंसक घटनांमुळे सिनेमाच्या यशाला गालबोट लागत असल्याची भावना सिनेप्रेमी व्यक्त करत आहेत.