सोशल मीडिया प्लॅटफॉर्मवर सुरू झालेली लव्ह स्टोरी, रेल्वे प्लॅटफॉर्मवर संपली! तरुणीच्या अपहरण प्रकरण एकाला अटक

Youth Arrested Allegedly Kidnapping A Teenage Girl Whom He Befriended On A Instagram:

रेल्वे पोलिसांनी एका 23 वर्षीय तरुणाला एका मुलीचे अपहरण केल्याच्या आरोपाखाली अटक केली आहे. या आरोपीची आणि मुलीची सोशल मीडिया प्लॅटफॉर्म इन्स्टाग्रामवर मैत्री झाली होती.

महाराष्ट्रातील ठाणे जिल्ह्यातील कल्याण स्थानकावर 18 ऑगस्ट रोजी ही घटना घडली. त्यानंतर 17 वर्षीय मुलीची सुटका करण्यात आली आणि तिचे अपहरण केल्याच्या आरोपावरून रविवारी त्या तरुणाला अटक करण्यात आली, असे जीआरपीने प्रसिद्धीपत्रकात म्हटले आहे.

मुंबईतील धारावी येथील रहिवासी असलेली ही तरुणी सोलापूरहून गदग एक्स्प्रेसच्या आरक्षित डब्यातून प्रवास करत होती. पोलिसांनी नंतर तपासलेल्या सीसीटीव्ही फुटेजनुसार, मुलगी ट्रेनमधून खाली उतरताना आणि कल्याण स्टेशनच्या प्लॅटफॉर्मवर एकटी फिरताना दिसली.

पोलिसांनी तिचा मोबाइल नंबर आणि माहिती देणाऱ्यांच्या मदतीने तपास केला आणि रायगड जिल्ह्यातील कर्जत येथील एका तरुणाने मुलीचे अपहरण केल्याची माहिती मिळाली. जीआरपीने सांगितले की, पोलिसांचे पथक कर्जतमधील आरोपीच्या घरी पोहोचले जेथे मुलगी सापडली.

मुलीची सुटका करून तिला तिच्या पालकांच्या ताब्यात देण्यात आले. आरोपी कुणाल रवींद्र रातंबे याला अपहरणाच्या आरोपाखाली अटक करण्यात आली आहे, असे पोलिसांनी सांगितले.

प्राथमिक तपासात ही मुलगी आणि आरोपीची इंस्टाग्रामवर मैत्री झाली आणि ते प्रेमात पडले, असे त्यांनी सांगितले. याप्रकरणी पुढील तपास सुरू असल्याचे पोलिसांनी सांगितले.