Shivsena Sambhaji Brigade: शिवसेनेला संभाजी ब्रिगेडची साथ, युतीची घोषणा

शिवसेना आणि संभाजी ब्रिगेडने एकत्र येण्याची घोषणा केली आहे. शिवसेना पक्षप्रमुख उद्धव ठाकरे (Uddhav Thackeray), संभाजी ब्रिगेडचे (Sambhaji Brigade) अध्यक्ष मनोज आखरे, मुख्य प्रवक्ते गंगाधर बनबरे यांनी एकत्रित ही घोषणा केली. शिवसेना आणि संभाजी ब्रिगेड आगामी निवडणुका एकत्र लढणार आहेत. शिवसेनेत फुट पडल्यानंतर पहिलीच संघटना शिवसेनेसोबत आली आहे. त्यामुळे शिवसेनेला बळ मिळाले आहे.

"देशात प्रादेशिक पक्ष संपवण्याचं कारस्थान सुरु आहे. आपल्या विचारांचे लोकं आज सोबत येत आहेत. प्रादेशिक अस्मिता वाचवण्यासाठी एकत्र यायला हवं असं मला अनेकजण म्हणतात. संभाजी ब्रिगेड आणि शिवसेना एकत्र येऊन आपण मोठा इतिहास घडवू, या लढवय्या सहकाऱ्यांचं मी स्वागत करतो." असं उद्धव ठाकरे यावेळी म्हणाले.

संभाजी ब्रिगेडचे मुख्य प्रवक्ते गंगाधर बनबरे म्हणाले, "उद्धव ठाकरे यांनी सत्तेत असताना प्रबोधनकारांचा विचार आक्रमकपणे मांडला. त्यांनी संघप्रणित विषमतावादी विचारांना सर्वशक्तीनिशी कार्यपद्धतीनं विरोध केला. संभाजी ब्रिगेड देखील लोकहित आणि महाराष्ट्राचं हित याच पार्श्वभूमीवर काम करत आहे. आम्ही एकत्र आलो आहोत. लवकरच एक महामेळावा घेतला जाईल."

महाराष्ट्रात आगामी स्थानिक निवडणूकांच्या पार्श्वभूमीवर ही युती महत्वाची ठरणार आहे. तसेच, शिवसेनेत पडलेले दोन गट पाहता शिवसेनेला देखील बळ मिळाले आहे. त्यामुळे महाराष्ट्रातील ही राजकीय घडामोड महत्वाची ठरणार आहे.