पाडव्याच्या शुभेच्छा देत सेनेचा केंद्राला टोला

शिवसेना (Shiv Sena) आणि भाजपा (BJP) या दोन पक्षांमध्ये सातत्याने कलगीतुरा रंगताना आपल्याला पाहायला मिळतो. दोन्ही पक्षांचे नेते एकमेकांवर कुरघोडी करण्याची संधी कधीही सोडत नाहीत. राज्यातील सध्याचं राजकीय वातावरण आणि निर्माण झालेली परिस्थिती या पार्श्वभूमीवर आज गुढी पाडव्याच्या (Gudi Padwa) निमित्ताने शिवसेनेने सामनाच्या अग्रलेखातून सर्वांना पाडव्याच्या शुभेच्छा दिल्या आहेत. मात्र, यावेळी केंद्रावर खोचक शब्दांत टीका देखील केली. देशात निर्माण झालेल्या महागाईच्या संकटावर यामध्ये निशाणा साधण्यात आलेला आहे. (Shiv Sena has criticized the central government)

राज्य सरकारची जनतेला‘पाडवा भेट’

“आज महाराष्ट्रातील जनताही करोनाचा (Corona) विनाश करून भयमुक्त आणि संकटमुक्त झालेली आहे. त्यात करोना काळात लावण्यात आलेले निर्बंध उठवून राज्यातील आघाडी सरकारने महाराष्ट्रातील जनतेला ‘पाडवा भेट’च दिली आहे”, असं अग्रलेखात म्हटलं गेलं आहे.

मागाईवरून केंद्र सरकारवर टोला!

दरम्यान, पाडव्याच्या शुभेच्छा देतानाच महागाईवरून शिवसेनेने टोला लगावला आहे. “महाराष्ट्र आणि देशातील जनतेने करोनाच्या विषाणूवर विजय मिळवून आयुष्याच्या नवीन वाटचालीचा श्रीगणेशा सुरू केला असला तरी महागाईच्या सरकारनिर्मित विषाणूला तोंड कसे द्यायचे? याचे मात्र कुठलेही उत्तर जनतेला सापडताना दिसत नाहीये. निवडणुकीपुरती स्वस्ताईची गुढी उभारून निवडणुका संपल्यावर महागाईची काठी उगारणाऱ्या केंद्रीय सरकारशी नवीन वर्षामध्ये जनतेला दोन हात करावे लागतील असे चित्र दिसते आहे”, असं ही अग्रलेखात म्हटलं आहे.

“करोना राक्षस गाडून जनतेने एक युद्ध जिंकलं, आता जनतेला नवनिर्मितीबरोबरच महागाईला गाडण्यासाठी संघर्षाचीही गुढी उभारावीच लागेल”, असं देखील त्यात नमूद करण्यात आलं आहे.