सदाभाऊ खोत,तुमच्यात हिंमत असेल तर...; जितेंद्र आव्हाडांचं खुलं आव्हान

केतकी चितळेने राष्ट्रवादीचे सर्वेसर्वा शरद पवार यांच्याबाबत आक्षेपार्ह पोस्ट केल्यानंतर तीच्यावर पोलीसांनी कारवाई केली आहे. तीच्या अडचणीत अजुनही वाढच होत आहे. या प्रकरणावरुन रयत क्रांती संघटनेचे अध्यक्ष आणि माजी मंत्री सदाभाऊ खोत यांनी केतकी चितळेचं कौतुक केले आहे. तर राष्ट्रवादी काँग्रेसचे नेते जितेंद्र आव्हाड यांनी सदाभाऊ खोत यांना खुलं आव्हान दिलं आहे. (Sadabhau Khot, if you have the courage ...; Open challenge of Jitendra Awhad )

घाटकोपर येथील माता रमाबाई आंबेडकर नगर मध्ये झालेल्या कार्यक्रमानंतर माध्यमांशी बोलताना जितेंद्र आव्हाडांनी भाजपावर टीका करतानाच केतकी चितळे प्रकरणावरून सदाभाऊ खोतांना आव्हान दिले कि, “मला सदाभाऊंना प्रश्न विचारायचा आहे. त्यांनी हिंमत असेल तर त्यांनी उत्तर द्यावं.

केतकीने जे बाबासाहेबांबद्दल लिहिलंय, तिनं जे महात्मा फुलेंबद्दल लिहिलंय, जे बौद्ध बांधवांबद्दल लिहिलंय त्याबाबत तिच्यावर अॅट्रॉसिटिचा गुन्हा दाखल झालाय. यावरून ती कणखर मनाची आहे असं तुम्ही मानताय का ? तिला माझं समर्थन आहे असं म्हणण्याची तुमच्यात हिंमत आहे का ?

मान्य असेल तर मग या, शिवाजी पार्कवर एकटे उभे राहून म्हणून दाखवा की माझं केतकीला समर्थन आहे. मी तिनं काय काय लिहिलंय याची संपुर्ण पोस्ट टाकणार आहे. तिची मानसिकता काय आहे, ती लिहिते कशी याकडे फक्त ती स्त्री आहे म्हणून दुर्लक्ष करून चालणार नाही. प्रचंड आत्मप्रौढीपणा तिच्यात ठसठसून भरलाय”, असं आव्हाड म्हणाले.