पिंपरी चिंचवड येथील दीड वर्षाच्या चिमूकलीने केली 'ओमिक्रॉन'वर मात

पुणे जिल्ह्यातील पिंपरी चिंचवड भागातील एका दीड वर्षाच्या मुलीला कोरोनाव्हायरसच्या ओमिक्रॉन (Omicron variant) प्रकाराची लागण झाली होती. तीने या आजारावर मात केली आहे, असे आरोग्य अधिकाऱ्यांनी शनिवारी सांगितले.

पिंपरी चिंचवड महानगरपालिका (पीसीएमसी) क्षेत्रातील चार नवीन रुग्णांमध्ये तीन वर्षांच्या मुलाचा देखील समावेश आहे. हे सर्व रुग्ण नायजेरियातील भारतीय वंशाच्या महिलेच्या आणि तिच्या दोन मुलींच्या संपर्क होते, ज्यांना आधी ओमिक्रॉन प्रकाराची लागण झाली होती. ही महिला पिंपरी चिंचवड येथे भावाला भेटण्यासाठी आली होती.

"आधी सापडलेल्या सहा ओमिक्रॉन रूग्णांपैकी चार रूग्णांची कोरोना (Coronavirus) चाचणीचे निकाल निगेटिव्ह आल्याकारणाने त्यांना रुग्णालयातून सोडण्यात आले आहे," असे एका अधिकाऱ्याने सांगितले.

तीन वर्षांचा रुग्णाची प्रकृती स्थिर आहे. त्याला कुठल्याही प्रकारचा त्रास होत नाही. इतर तीन रुग्ण देखील लक्षणे नसलेली आहेत. काळजीचे कारण नाही, असे पिंपरी चिंचवड महानगरपालिकेचे वैद्यकीय अधिकारी डॉ लक्ष्मण गोफणे यांनी सांगितले.

पुणे (Pune) शहरातील एकमेव ओमिक्रॉन रुग्णाची चाचणी निगेटिव्ह आली आहे, त्यालाही शुक्रवारी डिस्चार्ज देण्यात आला. तो फिनलंडहून पुण्याला परतला होता, अशी माहिती अधिकाऱ्यांनी दिली.