आर्यन खानला मुंबई उच्च न्यायालयाचा दिलासा

मुंबई क्रूझ ड्रग्ज प्रकरणात आर्यन खानला दिलासा मिळाला आहे. कोर्टाने आर्यनला दर शुक्रवारी एनसीबी कार्यालयात हजर राहण्यापासून सूट दिली आहे. मुंबई उच्च न्यायालयाने (Mumbai High Court) म्हटले आहे की, जेव्हाही दिल्ली SIT समन्स बजावेल तेव्हा आर्यनला हजर राहावे लागेल. विशेष म्हणजे आर्यनने जामिनाच्या अटींमध्ये सुधारणा करण्यासाठी हायकोर्टात अर्ज दाखल केला होता.

दरम्यान, बॉलीवूडचा सुपरस्टार शाहरुख खानचा (Shah Rukh Khan) मुलगा आर्यन खान याने ड्रग-ऑन-क्रूझ प्रकरणात जामीन मिळण्याची अट म्हणून अमली पदार्थ विरोधी एजन्सीच्या कार्यालयात साप्ताहिक हजेरीची अट बदलण्यासाठी उच्च न्यायालयात धाव घेतली होती. आर्यनच्या अर्जात त्याने दर शुक्रवारी नार्कोटिक्स कंट्रोल ब्युरोच्या (NCB) दक्षिण मुंबई कार्यालयात हजर राहण्याची अट माफ करण्याची मागणी केली होती. हा तपास आता दिल्ली नार्कोटिक्स कंट्रोल ब्युरोच्या (एनसीबी) विशेष तपास पथकाकडे सोपवण्यात आल्याने त्याची मुंबईतील कार्यालयात हजर राहण्याची अट शिथिल करता येईल, असे या अर्जात म्हटले आहे. ड्रग्ज बाळगणे, सेवन, विक्री आणि खरेदी केल्याच्या आरोपाखाली NCB ने 3 ऑक्टोबर रोजी मुंबईतील एका क्रूझ जहाजावर छापा टाकून आर्यनला अटक केली होती. त्याला 28 ऑक्टोबर रोजी उच्च न्यायालयाने जामीन मंजूर केला होता.