ख्रिसमसवेळी मुंबईत गर्दी टाळा; बृहन्मुंबई महापालिकेचे आवाहन

ओमिक्रॉनच्या प्रसारामुळे मुंबईत चिंतेचे वातावरण निर्माण झाले आहे. परिणामी बृहन्मुंबई महानगरपालिकेच्या (BMC) प्रमुखांनी लोकांना आगामी ख्रिसमस सणावेळेस गर्दी टाळण्याचे आवाहन केले आहे. नियमांचे उल्लंघन करणाऱ्यांवर कठोर कारवाई करण्याचा इशारा बीएमसी आयुक्त इक्बाल सिंग चहल यांनी दिला आहे.

"कोरोनाव्हायरसच्या (Coronavirus) ओमिक्रॉन (Omicron variant) प्रकारामुळे जगातील अनेक देशांतील परिस्थिती पुन्हा एकदा नियंत्रणाबाहेर गेली आहे आणि लॉकडाउनसारखी परिस्थिती निर्माण झाली आहे. तुम्ही मास्क घाला आणि कोविड -19 मार्गदर्शक तत्त्वांचे पालन करा. सर्व नागरिकांनी लसीकरण करणे आवश्यक आहे," असे नागरी संस्था प्रमुखांनी रविवारी जारी केलेल्या प्रसिद्धीपत्रकात म्हटले आहे.

बीएमसी (BMC) आयुक्तांनी लोकांना हॉटेल, रेस्टॉरंट, सिनेमा, मॉल्स आणि इतर ठिकाणी सर्व कोविड-19 नियमांचे पालन करण्याचे आवाहन केले. "कोविड -19 नियमांचे उल्लंघन करणार्‍यांवर बीएमसीच्या वॉर्ड स्तरावरील टीम तसेच मुंबई पोलिस प्रशासनाकडून कठोर कारवाई केली जाईल," असे बीएमसी प्रमुखांनी एका प्रसिद्धीपत्रकात म्हटले आहे.

बीएमसीच्या म्हणण्यानुसार, महाराष्ट्राच्या (Maharashtra) मुख्य सचिवांनी 27 नोव्हेंबर रोजी एक आदेश जारी केला आणि COVID-19 चा प्रसार रोखण्यासाठी मार्गदर्शक तत्त्वे निश्चित केली. मुंबई पोलिसांनी 14 डिसेंबर रोजी एक अधिसूचनाही जारी केली, ज्यामध्ये असे म्हटले आहे की उल्लंघन करणार्‍यांवर भारतीय दंड संहिता तसेच महामारी रोग कायदा आणि राष्ट्रीय आपत्ती व्यवस्थापन कायद्यानुसार कारवाई केली जाईल.