शासकीय कर्मचारी संपात सहभागी झाल्यास होणार...

राज्यातील सरकारी कर्मचाऱ्यांनी आज मध्यरात्रीपासून दोन दिवसांच्या संपाची घोषणा केली आहे. दरम्यान, संपात सहभागी होणाऱ्या कर्मचाऱ्यांवर शिस्तभंगाची कारवाई होणार असल्याचे सरकारकडून (Government of Maharashtra) सांगण्यात आले आहे. मात्र याचवेळी राज्य शासकीय कर्मचाऱ्यांच्या दोन दिवसीय संपाच्या पार्श्वभूमीवर राज्य सरकारकडून एक परिपत्रक काढण्यात आले. त्यात संपात सहभागी होणाऱ्या कर्मचाऱ्यांवर शिस्तभंगाची कारवाई होणार असल्याचे स्पष्ट करण्यात आले आहे. तसेच संपात सहभागी झाल्यास काम नाही, वेतन नाही हे धोरण राबवण्यात येणार असल्याचे देखील सरकारकडून स्पष्ट करण्यात आले आहे. (State Employee Strike In Maharashtra From Today Midnight)

उपमुख्यमंत्री अजित पवार (Ajit Pawar) यांच्या अध्यक्षतेखाली या प्रकरणावर तोडगा काढण्यासाठी आज दुपारी बैठक पार पडली. मात्र त्या बैठकीतून कोणताही तोडगा निघाला नाही. त्यानंतर संध्याकाळी सात वाजता सह्याद्री अतिथिगृहावर पुन्हा बैठकीचे आयोजन करण्यात आले आहे व सध्या ती बैठक सुरू आहे, या बैठकीला राज्याचे मुख्य सचिव तसेच कर्मचारी संघटनांचे प्रतिनिधीदेखील उपस्थितआहेत. यात जर तोडगा निघाला तर संप मागे घेतला जाणार आहे, अन्यथा संप सुरू राहणार आहे असे स्पष्ट करण्यात आले आहे.

संप कशासाठी

नोकरभरती, जुनी पेन्शन योजना (Pension) आणि निवृत्तीचं वय वाढवण्याच्या मागणीसाठी सरकारी कर्मचारी आज मध्यरात्रीपासून दोन दिवस संपावर जाणार आहेत. या आंदोलनात शिक्षक आणि शिक्षकेतर कर्मचारीही सहभागी होणार आहेत. दरम्यान, संपाच्या पार्श्वभूमीवर राज्य शासनाने घेतलेल्या भूमिकेमुळे नेमका यावर काय निर्णय होतो याकडे सर्वांचे लक्ष लागून राहिले आहे.