Goa Live News: 'भाजपचा राजीनामा देणार आणि 2027 मध्ये कळंगुट जिंकू देणार नाही!' - रोशन रेडकर यांचे थेट आव्हान

हडफडे येथील 'बर्च बाय रोमिओ लेन' (Birch by Romeo Lane) या नाईट क्लबमधील आग दुर्घटनेनंतर हणजूण पोलिसांनी चौकशीसाठी बोलावलेल्या हडफडे सरपंच रोशन रेडकर यांनी मोठा राजकीय निर्णय जाहीर केला आहे. रेडकर यांनी भाजपचा राजीनामा देत असल्याचे स्पष्ट केले आहे.

इतकेच नव्हे तर, आगामी २०२७ च्या विधानसभा निवडणुकीत भाजप कळंगुट मतदारसंघात जिंकणार नाही, याची खात्री देणार असल्याचे आव्हानही त्यांनी दिले आहे.

हडफडे  येथील नाईट क्लब आग दुर्घटनेत बळी पडलेल्या एकूण २५ निष्पाप व्यक्तींपैकी पाच जणांची ओळख पटली आहे. या मृतांमध्ये प्रामुख्याने क्लबमध्ये काम करणारे तरुण कर्मचारी आहेत. त्यांची नावे आणि मूळ ठिकाणे खालीलप्रमाणे आहेत:

• मोहित मुंडा (वय १८, झारखंड)

• प्रदीप महातो (वय २२, रांची)

• बिनोद महातो (वय १९, रांची)

• राहुल तांती (आसाम)

• सतीश सिंग राणा (वय २६, उत्तराखंड)

इतर मृतांची ओळख पटवण्यासाठी आणि त्यांच्या कुटुंबापर्यंत पोहोचण्यासाठी तपास सुरू आहे.

हडफडे येथील भीषण आग दुर्घटनेच्या संदर्भात पोलिसांनी आरपोरा सरपंच रोशन रेडकर यांना चौकशीसाठी पोलीस ठाण्यात बोलावल्यानंतर तणावाचे वातावरण निर्माण झाले. या घटनेनंतर सरपंचाचे समर्थक आणि स्थानिक नागरिक मोठ्या संख्येने अंजुना पोलीस ठाण्याबाहेर जमा झाले.

काँग्रेस नेत्यांसोबत झालेल्या बैठकीनंतर आरजीपी अध्यक्ष मनोज परब यांनी पक्ष युतीवर पुढे जाण्यास तयार झाल्यास, आज सकाळी पुन्हा भेटण्याची तयारी दर्शविली होती. मात्र, काँग्रेस नेत्यांचा दावा आहे की, त्यांनी दुपारपर्यंत परब यांची वाट पाहिली, परंतु त्यांना आरजीपीकडून कोणताही प्रतिसाद मिळाला नाही. यामुळे युतीसंदर्भात दोन्ही पक्षांमध्ये सध्या संवादाचा अभाव असल्याचे दिसत आहे.

मंत्री रोहन खंवटे यांनी हडफडे येथील क्लब आग दुर्घटनेतील पीडितांची भेट घेऊन त्यांचे सांत्वन केले. या घटनेची योग्य चौकशी झाली पाहिजे आणि जबाबदारी न घेणाऱ्या आस्थापनांविरुद्ध त्वरित एफआयआर (FIR) दाखल केला पाहिजे, अशी मागणी त्यांनी केली. गोव्यासाठी पर्यटन महत्त्वाचे असल्याने, अशा सर्व ठिकाणांनी अग्नी आणि सुरक्षा नियमांचे कठोर पालन करणे बंधनकारक आहे, असेही मंत्री खंवटे यांनी स्पष्ट केले.

हडफडे दुर्घटनेतील जखमीचा आम आदमी पक्षाच्या (AAP) गोवा युनिटने बांबोळीतील गोमेकॉ (GMC) येथे आरपोरा आग दुर्घटनेतील जखमी पीडिताची भेट घेतली. पीडिताने दुर्घटनेचा थरार सांगताना म्हटले की, "नृत्य सादरीकरणादरम्यान फ्लेअर गनचा वापर करण्यात आला, ज्यामुळे छताने पेट घेतला. अवघ्या ३० सेकंदांच्या आत छत कोसळायला लागले. बाहेर पडण्यासाठी कोणताही पर्यायी मार्ग नसल्यामुळे अनेक लोक अडकले आणि त्यांचा दुर्दैवी मृत्यू झाला." 'आप' गोवा पक्षाचे अध्यक्ष अमित पालेकर यांनी सरकारला या घटनेची सखोल चौकशीकरण्याची मागणी केली आहे.रार

बार्देस तालुक्यातील हडफडे येथे झालेल्या मोठ्या आगीच्या दुर्घटनेच्या पार्श्वभूमीवर उत्तर गोवा जिल्हाधिकाऱ्यांनी महत्त्वाचा निर्णय घेतला आहे. प्रभावी निरीक्षण , घडामोडींवर तातडीने प्रतिसाद आणि लोकांच्या तक्रारींचे निवारण करण्यासाठी एक नियंत्रण कक्ष स्थापन करण्यात आला आहे.

आमदार मायकल लोबो हे आज हडफडे येथील भीषण दुर्घटनेबद्दल बोलताना अत्यंत भावूक झाले. मृतांबद्दल बोलत असताना त्यांना आपला गळा दाटून आला आणि ते रडू लागले . या दुःखद घटनेवर बोलताना लोबो यांनी आपल्या भावनांना वाट मोकळी करून दिली.