Goa News Updates: भूतानी प्रकल्पाविरुद्धच्या आंदोलनाला गोवा फॉरवर्ड पक्षाचा पाठिंबा; वाचा दिवसभरातील घडामोडी

राज्यात गेल्या काही दिवसांपासून भूतानी प्रकल्पाच्या मुद्यावरुन रान उठलं आहे. सांकवाळचे माजी सरपंच प्रेमानंद नाईक उपोषणाला बसले आहेत. जोपर्यंत भूतानी प्रकल्पाला दिलेली मान्यता रद्द होत नाही तोपर्यंत उपोषण मागे घेणार नाही अशी भूमिका नाईकांनी घेतली आहे. यातच आता, भूतानीविरुद्धच्या आंदोलनाला गोवा फॉरवर्ड पक्षाने पाठिंबा दर्शवला आहे. या प्रकल्पाच्या विरोधात एकजूटीने लढण्याची गरज यावेळी गोवा फॉरवर्ड पक्षाचे सरचिटणीस मोहनदास लोलिनकरांनी बोलून दाखवली.

शिक्षकाच्या नोकरीचे आमिष दाखवून 15 लाखांची फसवणूक केल्याप्रकरणी सागर सुरेश नाईक ( कुर्टी, फोंडा) या पोलिस खात्याच्या कर्मचाऱ्याला फोंडा पोलिसांकडून अटक

कोलवा ग्रामसभेने अनेक विषयांवर चर्चा केली, ज्यामध्ये एनजीओचे ऑडिट, नवीन पंचायतीचं ठिकाण, शेतकऱ्यांवर परिणाम करणाऱ्या विषयांचा समावेश होता. याशिवाय, सोनाबाटी रोडवरील अवजड वाहतूक, भाडेकरु पडताळणी आणि औषध व्यावसायिकांचे नियमन याबाबत चिंता व्यक्त करण्यात आली. रोमी कोंकणीला समान दर्जा मिळावा या मागणीसह ग्रामसभेने कॅशलेस सुविधा, निवडून आलेल्या सदस्यांसाठी वाढीव पगार आणि अतिक्रमण विरोधात उपायही सुचवले.

हणजूण येथे सनबर्नसारख्या फेस्टिव्हलच्या विरोधात ग्रामस्थांनी आज (27 ऑक्टोबर) मूक मोर्चा काढला. ग्रामस्थांनी यावेळी अशा पेस्टिव्हलबाबत चिंता व्यक्त केली. अशा फेस्टिव्हलमुळे गावातील शांतता भंग होत असल्याचे ते यावेळी म्हणाले.

अडवलपाल पंचायतीच्या ग्रामसभेत खाण मुद्दा तापला. 'फोमेंतो' खाणीला दिलेली 'एनओसी' मागे घ्या. लोकांची मागणी. सरपंचांच्या अनुपस्थितीमुळे ग्रामस्थ नाराज.

शुक्रवारी झुआरी पूलावरुन उडी मारलेल्या पोलीस कॉन्स्टेबलचा मृतदेह मुरगाव पोलीस ठाण्याच्या हद्दीत झुआरी नदीत सापडला.

अनिर्बंध खनिज व्यवसायामुळे शेती व्यवसायावर संक्रात. मये पंचायतीच्या ग्रामस्थांचा आरोप.

रणजी ट्रॉफी प्लेट विभागीय क्रिकेट सामन्यात गोव्याने नागालँडवर 32 धावांनी आघाडी घेतली आहे. 179 धावांच्या प्रत्युत्तरात नागालँडने पहिल्या डावात सर्वबाद 147 धावा केल्या.

दूधसागर हंगामाच्या सर्व मागण्या सरकारने मान्य करुन सर्व काही सुरळीत होण्यासाठी स्थानिकांकडून दूधसागर देवाला सामूहिक गाऱ्हाणे घालण्यात आले.