वुमन्स प्रिमियर लीग 2024 चा चौथा सामना दिल्ली कॅपिटल्स आणि UP वॉरियर्स यांच्यात बंगळुरु येथील एम. चिन्नास्वामी स्टेडियमवर खेळला गेला. पहिल्या सामन्यात दोन्ही संघांना पराभवाचा सामना करावा लागला होता.
या मोसमातील पहिला सामना खेळणाऱ्या मेग लॅनिंगच्या नेतृत्वाखाली दिल्ली कॅपिटल्सला मुंबई इंडियन्सकडून पराभव पत्करावा लागला. तर ॲलिसा हिली कर्णधार असलेल्या यूपी वॉरियर्सचाही रोमहर्षक सामन्यात रॉयल चॅलेंजर्स बंगळुरुकडून 2 धावांनी पराभव झाला होता. त्यामुळे आजचा सामना जिंकणे दोन्ही संघांसाठी अत्यंत महत्त्वाचे मानले जात होते.
मात्र, आज झालेल्या सामन्यात दिल्ली कॅपिटल्सने बाजी मारली. दिल्ली कॅपिटल्सने यूपी वॉरियर्सचा नऊ गडी राखून पराभव केला. दिल्लीची स्टार सलामीवीर शफाली वर्माने शानदार फलंदाजी केली. शफाली आणि मॅग लॅनिंग या जोडीच्या शानदार खेळीच्या जोरावर दिल्लीने सामना जिंकला.
पहिल्या सामन्यात पराभूत झाल्यानंतर दिल्ली कॅपिटल्सने धडा घेत हंगामातील आपला विजय यूपी वॉरियर्सविरुद्ध नोंदवला. दिल्ली कॅपिटल्सने नाणेफेक जिंकून प्रथम गोलंदाजी करण्याचा निर्णय घेतला होता.
दरम्यान, नाणेफेक हारल्यानंतर पहिल्यांदा फलंदाजी करताना यूपी वॉरियर्सने 20 षटकांत 9 गडी गमावून 119 धावा केल्या होत्या. यूपीने दिल्ली कॅपिटल्सला 120 धावांचे लक्ष्य दिले होते. यूपीकडून श्वेता सेहरावतने (42 चेंडूत 45, पाच चौकार, एक षटकार) सर्वाधिक धावा केल्या. तिच्याशिवाय अन्य कोणत्याही खेळाडूला 20 धांवाचाही टप्पा ओलांडता आला नाही.
ग्रेस हॅरिसने 17, कर्णधार ॲलिसा हिलीने 13 तर किरण नवगिरे आणि पूनम खेमनारने प्रत्येकी 10 धावांचे योगदान दिले. तर दुसरीकडे, दिल्लीसाठी राधा यादवने चार आणि मारिजन कॅपने तीन बळी घेतले. त्याचबरोबर, ॲनाबेल सदरलँड आणि अरुंधती रेड्डी यांनी प्रत्येकी एक विकेट घेतली.
दुसरीकडे, प्रत्युत्तरात दिल्लीने 14.3 षटकांत एका विकेटच्या मोबदल्यात 123 धावा करुन सामना जिंकला. संघाने 33 चेंडू शिल्लक असताना सामना जिंकला. दिल्लीकडून शफाली वर्माने सर्वाधिक नाबाद 64 धावा केल्या. तिने 43 चेंडूंच्या खेळीत सहा चौकार आणि चार षटकार मारले. कर्णधार मॅग लॅनिंगने 43 चेंडूत 51 धावा केल्या, यामध्ये तिने सहा चौकार मारले.
शफाली आणि लॅनिंग यांनी पहिल्या विकेटसाठी 119 धावांची भागीदारी केली. संघाला एका धावेची गरज असताना कर्णधार लॅनिंग बाद झाली. सोफी एक्लेस्टोनने तिला वृंदा दिनेशकरवी झेलबाद केले. मात्र, तिच्यानंतर आलेल्या जेमिमाह रॉड्रिग्जने विजयी चौकार ठोकत सामना संपवला.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.