Rishabh Pant Accident: पंतने आराम करायचा कसा? पाहुण्यांची वर्दळ ठरतेय डोकेदुखी

Rishabh Pant Accident: भारतीय क्रिकेट संघाचा 25 वर्षीय यष्टीरक्षक फलंदाज ऋषभ पंत याचा 30 डिसेंबर 2022 रोजी सकाळी अपघात झाला. दिल्लीवरून रुडकीला येत असतानाचा त्याची कार डिव्हायडरला धडकली. या अपघातात त्याला अनेक ठिकाणी दुखापती झाल्या आहेत. सध्या त्याच्यावर डेहराडूनमधील मॅक्स हॉस्पिटलमध्ये उपचार सुरू आहेत.

पण, त्याला हॉस्पिटलमध्ये सातत्याने कोणी ना कोणी भेटायला येत आहे, त्यामुळे त्याला आराम मिळत नसल्याचे आता म्हटले जात आहे. त्यामुळे त्याच्या कुटुंबियांनी चिंता व्यक्त केली आहे.

पंतवर उपचार करत असलेल्या मेडिकल टीममधील एका सदस्याने टाईम्स ऑफ इंडियाला सांगितले की 'ऋषभ पंतला पुरेसा मानसिक आणि शारिरीक विश्राम मिळणे गरजेचे आहे. त्याला अजूनही दुखापतींमुळे वेदना होत आहेत. त्याला भेटायला येणाऱ्या लोकांबरोबर बोलावे लागत आहे. त्यामुळे लवकर बरे होण्यासाठी लागणारी एनर्जी त्यात वाया जात आहे.'

'त्याला भेटायला येण्याची योजना करणाऱ्या लोकांनी सध्यातरी हे टाळले पाहिजे आणि त्याला आराम करू दिला पाहिजे.'

तसेच हॉस्पिटलमधील आणखी एका सदस्याने सांगितले की 'सध्या तरी पंतला भेटायला येणाऱ्यांसाठी कोणतेही फिल्टर लावण्यात आलेले नाही. हॉस्पिटलमध्ये सकाळी 11 ते दुपारी 1 आणि दुपारी 4 ते 5 या दरम्यान भेटायला येण्याची वेळ असते. तसेच या वेळेत केवळ एका व्यक्तीलाच रुग्णाला भेटण्याची परवानगी असते. पण पंतची केस हाय प्रोफाईल आहे, त्यामुळे अनेक लोक भेटायला येत आहे. त्यामुळे समस्या निर्माण होत आहे.'

रिपोर्ट्सनुसार आत्तापर्यंत पंतला दिल्ली क्रिकेट बोर्डातील सदस्य, सरकारी अधिकारी, अभिनेते अनुपम खेर आणि अनिल कपूर, क्रिकेटपटू नितीश राणा यांसारखे अनेक मान्यवर भेटून गेले आहेत.

दरम्यान, पंतच्या डोक्याला, पाठीला, हाताला आणि पायाला दुखापती झाल्या आहेत. दरम्यान, त्याच्या मेंदूचे आणि पाठीच्या स्कॅनचे रिपोर्ट्स नॉर्मल आल्याचे समजले आहे. पण त्याच्या गुडघ्यामध्ये लिगामेंट टियर आहेत. त्यामुळे त्याला या दुखापतीमधून पूर्णपणे बाहेर येण्यासाठी कमीत कमी 6 महिने लागण्याची शक्यता आहे. त्यामुळे पुढील 6 महिने तरी त्याला क्रिकेटपासून दूर राहावे लागण्याची शक्यता आहे.