Virat Kohli Hugged Rohit Sharma during India vs Sri Lanka Asia Cup 2023 match:
मंगळवारी भारतीय संघाने श्रीलंकेविरुद्ध आशिया चषक 2023 स्पर्धेतील सुपर फेरीच्या सामन्यात 41 धावांनी विजय मिळवला. कोलंबोला झालेल्या या सामन्यातील विजयामुळे भारतीय संघाने अंतिम सामन्यातील प्रवेश निश्चित केला आहे.
दरम्यान भारताच्या विजयात कर्णधार रोहित शर्माचे योगदानही महत्त्वाचे ठरले. दरम्यान, या सामन्यातील आणखी एक घटना चर्चेत राहिली, ती म्हणजे विराट कोहलीने रोहितला मारलेली मिठी.
झाले असे की श्रीलंकेचा संघ भारताने दिलेल्या २१४ धावांच्या आव्हानाचा पाठलाग करत होता. यावेळी ७५ धावांच्या आतच श्रीलंकेने ५ विकेट्स गमावल्या होत्या. पण त्यानंतर कर्णधार दसून शनका आणि धनंजय डी सिल्वा हे श्रीलंकेचा सावरत होते. त्यांनी २६ धावांची भागीदारीही केली होती.
पण त्याचवेळी रविंद्र जडेजाने गोलंदाजी केलेल्या २६ व्या षटकाच्या पहिल्याच चेंडूवर शनकाने शॉट मारण्याचा प्रयत्न केला. मात्र चेंडू त्याच्या बॅटची कड घेत मागे गेला. यावेळी स्लीपमध्ये क्षेत्ररक्षण करणाऱ्या रोहितने चपळाईने उजव्या बाजूला सूर मारत दोन्ही हातांनी जमिनीलगत झेल घेतला.
त्याने घेतलेला शानदार झेल पाहून भारतीय खेळाडूंनी विकेट मिळाल्याचा जल्लोष केला. याचवेळी विराटही धावत आला आणि त्याने झेल घेतलेल्या रोहितला कडकडून मिठी मारली. या घटनेचे व्हिडिओ आणि फोटो सध्या सोशल मीडियावर व्हायरल होत आहेत. तसेच अनेक चाहत्यांना त्यांच्यातील हा ब्रोमान्स भावला आहे.
याच सामन्यादरम्यान रोहित आणि विराट यांच्या जोडीने खास विक्रम केला आहे. या दोघांमध्ये या सामन्यात 16 चेंडूत केवळ 10 धावांची भागीदारी झाली होती. पण या भागीदारी दरम्यान वनडेत या दोघांच्या भागीदारीत 5000 धावा पूर्ण झाल्या.
या दोघांनी 86 डावात भागीदारी करताना 5000 धावांचा टप्पा पार केला. त्यामुळे त्यांची वनडेत भागीदारीमध्ये सर्वात जलद 5000 धावा पूर्ण करणारी जोडी ठरली आहे.
त्यांनी गोर्डन ग्रिनीज आणि देडमंड हाइन्स यांच्या जोडीचा विक्रम मोडला आहे. ग्रिनीज आणि हाइन्स यांच्या जोडीने 97 वनडे डावात भागादीरी करताना 5000 धावांचा टप्पा पार केला होता.
या सामन्यात रोहितने अर्धशतकी खेळी करताना 48 चेंडूत 53 धावा केल्या. या खेळीत त्याने 7 चौकार आणि 2 षटकार मारले. दरम्यान विराट मात्र ३ धावांवर बाद झाला.
या सामन्यात प्रथम फलंदाजी करताना भारताचा डाव 49.1 षटकात 213 धावांवर संपुष्टात आला होता. त्यानंतर २१४ धावांच्या आव्हानाचा पाठलाग करताना श्रीलंकेला 41.3 षटकात सर्वबाद 172 धावाच करता आल्या.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.