व्हाल्सकिस पुन्हा मूळ संघात, जमशेदपूरचा आघाडीपटू बाकी मोसमासाठी चेन्नईयीनकडे

पणजी :  इंडियन सुपर लीग (आयएसएल) फुटबॉल स्पर्धेत दोन मोसमापूर्वी गोल्डन बूटचा मानकरी ठरलेला आघाडीपटू नेरियूस व्हाल्सकिस शनिवारी पुन्हा मूळ संघात परतला.

जानेवारी महिन्यातील संघ बदल प्रक्रियेत लिथुआनियाच्या या स्ट्रायकरला परवानगी मिळाली आहे. तो आता जमशेदपूर एफसी संघातून चेन्नईयीन (Chennai) एफसी या मूळ संघात परतला आहे. ही माहिती क्लबतर्फे शनिवारी माहिती देण्यात आली.

व्हाल्सकिस 34 वर्षांचा आहे. चेन्नईयीन एफसीतर्फे 2019-20 मोसमात त्याने आयएसएल (ISL) स्पर्धेत पदार्पण केले. त्या मोसमात चेन्नईयीनने अंतिम फेरी गाठली आणि 15 गोल व सहा असिस्टसह व्हाल्सकिसने गोल्डन बूटचा मान मिळविला. मात्र 2020-21 मोसमासाठी त्याने जमशेदपूर संघाशी करार केला. त्यांच्यातर्फे खेळताना व्हाल्सकिसने 18 सामन्यात आठ गोल केले, तर यंदाही याच संघातर्फे त्याने सहा सामन्यात दोन गोल नोंदविले.