पणजी: आगामी आय-लीग फुटबॉल स्पर्धेत (I-League football tournament) सहभागी संघाची संख्या वाढल्याने सामनेही जास्त असतील. कोरोना विषाणू (Covid 19) महामारी पार्श्वभूमीवर आवश्यक उपाययोजनांसह कोलकात्यात डिसेंबरपासून स्पर्धा घेण्याचे अखिल भारतीय फुटबॉल महासंघाच्या (All India Football Federation) लीग कमिटीचे नियोजन आहे.
गतमोसमातील आय-लीग स्पर्धेत 11 संघ होते. मणिपूरचा नेरोका एफसी संघ तळास राहिला होता, पण महामारीच्या कारणास्तव त्यांची पदावनती रोखण्यात आली. 2021-22 मोसमातील आय-लीग स्पर्धेसाठी विशाखापट्टणम येथील श्रीनिधी फुटबॉल क्लबला थेट प्रवेश देण्यात आला आहे, तर अन्य एक संघ पात्रता फेरीतील विजेता असेल. ही फेरी बंगळूरमध्ये येत्या सप्टेंबरमध्ये खेळविण्याचे नियोजन आहे. या स्पर्धेत दहा संघ असतील.
नव्या आय-लीग मोसमात 13 संघ भाग घेणार असल्याने सामने वाढले आहेत. त्यामुळे मोसमात 80 ऐवजी 114 सामने होतील. गतमोसमात आय-लीग स्पर्धा जैवसुरक्षा वातावरणात कोलकाता येथेच झाली होती. पहिल्या टप्प्यात प्रत्येक संघ एकमेकांविरुद्ध खेळला, नंतर गुणतक्त्यातील क्रमवारीनुसार संघांची दोन गटात विभागणी झाली. यंदाही स्पर्धा याच पद्धतीने खेळली जाईल, अशी माहिती लीगचे मुख्य कार्यकारी अधिकारी (सीईओ) सुनंदो धर यांनी दिली. त्यानुसार दुसऱ्या टप्प्यात पहिला गट सात संघांचा असेल, त्यांच्यात विजेतेपदासाठी चुरस असेल. दुसऱ्या गटात सहा संघ असतील. हे संघ पदावनती टाळण्यासाठी खेळतील.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
