स्पोर्टिंग क्लब द गोवा संघाने फुटबॉल स्पर्धेत नोंदवला पहिला विजय

पणजी: स्पोर्टिंग क्लब द गोवा संघाने (Sporting Club The Goa) नवी दिल्लीत सुरु असलेल्या क्लब फुटबॉल स्पर्धेत रविवारी पहिल्या विजयाची नोंद केली. लॉईड कार्दोझ याने नोंदविलेल्या दोन गोलच्या बळावर त्यांनी पुदुचेरीच्या कुप्पुराज एफसी संघास 3-2 फरकाने हरविले. स्पोर्टिंग क्लबला स्पर्धेतील पहिल्या सामन्यात बंगळूर एफसीविरुद्ध दोन गोलची आघाडी घेऊनही 3-2 फरकाने हार पत्करावी लागली होती. रविवारी कुप्पुराज संघाने आघाडी घेतली. मात्र नंतर स्पोर्टिंगने जम बसवत पूर्ण गुणांची कमाई केली.

के. राजागणपती याने 21 व्या मिनिटास कुप्पुराज संघाला आघाडी मिळवून दिली. लगेच 22 व्या मिनिटास लॉईडने स्पोर्टिंगला बरोबरी साधून दिली. 23 व्या मिनिटास रोहित तोताड याने गोल करून गोव्याच्या संघास 2-1 असे वर्चस्व प्राप्त करून दिले. लॉईड कार्दोझने 38 व्या मिनिटास आणखी एक गोल केल्यानंतर 38 व्या मिनिटास ऑस्टिन जिजो याने कुप्पुराज संघाची पिछाडी 2-3 अशी कमी केली. कुप्पुराज संघाचा हा स्पर्धेतील सलग दुसरा पराभव ठरला. स्पर्धेत आता स्पोर्टिंगच्या लॉईड कार्दोझने तीन, तर रोहित तोताडने दोन गोल नोंदविले आहेत. स्पोर्टिंग क्लबचा पुढील सामना स्पीडफोर्स एफसी संघाविरुद्ध होईल.