World Cup 2023: एकदिवसीय विश्वचषक स्पर्धेतील अंतिम सामना रविवारी भारत आणि ऑस्ट्रेलिया यांच्यात होणार आहे. या सामन्यासाठी टीम इंडिया पूर्णपणे सज्ज आहे. भारताचा हा सामना अहमदाबादच्या नरेंद्र मोदी क्रिकेट स्टेडियमवर होणार आहे.
टीम इंडियाने गेल्या 10 वर्षांत आयसीसीचे एकही विजेतेपद जिंकलेले नाही. अशा परिस्थितीत चाहत्यांना टीम इंडियाकडून मोठ्या अपेक्षा आहेत. या संपूर्ण विश्वचषकात भारताने चमकदार कामगिरी केली आहे. दरम्यान, या सामन्यात सर्वांच्या नजरा शुभमन गिलवर असतील. अहमदाबादमधील गिलचे आकडे चकित करणारे आहेत.
दरम्यान, शुभमन गिल आयपीएलमध्ये (IPL) गुजरात टायटन्सकडून खेळतो. तर गुजरात संघाचे होम ग्राउंड अहमदाबाद हेच आहे. यंदाच्या आयपीएलमध्ये सर्वाधिक धावा करणाऱ्या फलंदाजांच्या यादीत शुभमन गिल पहिल्या स्थानावर आहे.
गिलने आयपीएलच्या काळात या स्टेडियममध्ये खूप धावा केल्या आहेत. मात्र, या विश्वचषकात गिलने आपल्या बॅटने एकही शतक झळकावलेले नाही. अहमदाबादमधील अंतिम सामन्यातच गिल शतक झळकावेल अशी अपेक्षा आहे. अशा परिस्थितीत अहमदाबादच्या नरेंद्र मोदी स्टेडियममधील शुभमन गिलच्या आकडेवारीवर एक नजर टाकूया.
शुभमन गिल या विश्वचषकात चांगल्या फॉर्ममध्ये आहे. उपांत्य फेरीतही त्याने शानदार फलंदाजी केली. अहमदाबादमधील अंतिम सामन्यापूर्वी त्याच्या आकडेवारीवर एक नजर टाकली तर शुभमन गिलने नरेंद्र मोदी स्टेडियमवर एकूण 12 आयपीएल सामने खेळले आहेत. जिथे त्याने 48.73 च्या सरासरीने 669 धावा केल्या आहेत.
या कालावधीत त्याने 2 शतके आणि 3 अर्धशतके झळकावली आहेत. आंतरराष्ट्रीय सामन्यांबद्दल बोलायचे झाल्यास, शुभमन गिलने इथे एकूण 2 कसोटी आणि एक वनडे सामना खेळला आहे. कसोटीत त्याच्या नावावर 193 धावा आहेत, तर त्याने शतकही ठोकले आहे. विशेष म्हणजे, त्याने हे शतक ऑस्ट्रेलियाविरुद्धच केले आहे.
दुसरीकडे, एकदिवसीय क्रिकेटमध्ये शुभमन गिलने अहमदाबादच्या नरेंद्र मोदी स्टेडियमवर फक्त 1 सामना खेळला आहे. या विश्वचषक स्पर्धेत भारत (India) आणि पाकिस्तान यांच्यात हा सामना झाला होता.
या सामन्यात शुभमन गिलने केवळ 16 धावा केल्या होत्या, ज्यामध्ये त्याने 11 चेंडूंचा सामना केला होता. गिलला इथे एकदिवसीय सामन्यांमध्ये फारशी संधी मिळालेली नाही, परंतु गिलला यावेळी या स्टेडियममध्ये आपली एकदिवसीय आकडेवारी सुधारण्याची इच्छा आहे.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.