सचिनच्या पत्नी गोव्यातील मत्सोद्योगाच्या प्रेमात

फातोर्डा : महान क्रिकेटपटू सचिन तेंडुलकर (Sachin Tendulkar) याचे मत्स्यप्रेम जगजाहीर आहे. अधूनमधून तो माशांवर यथेच्छ ताव मारण्यासाठी सहकुटुंब दक्षिण गोव्यात येतो. येथील खेकड्यांची चव न्यारी असल्याचे त्याने वेळोवेळी सांगितले आहे. सचिनची पत्नी अंजलीही पतीप्रमाणेच गोव्यातील मत्सोद्योगाने भारावली, तिने येथील पारंपरिक व्यावसायाचे मनमुराद कौतुक केले. (Sachin Tendulkar's wife falls in love with Goa fishing industry)

अंजली सध्या गोव्याच्या (goa) भेटीवर असून बाणावली येथील एका पंचतारांकित हॉटेलमध्ये त्यांचे वास्तव्य आहे. पहाटेच्या ‘मॉर्निंग वॉक’ वेळी बाणावली समुद्र (sea) किनारी रपेट मारत असता, अंजली हिच्या नजरेस गोव्यातील पारंपरिक वडिलोपार्जित मासेमारी दिसली आणि तिची पावले थबकली. राज्यातील तरुण ‘निज रापणकार’ तन्मयतेने पारंपरिक व्यवसायाचे जतन करत असल्याबद्दल त्यांना आनंदही झाला.

अभिमानास्पद कार्य

बाणावली समुद्र किनारी आलेल्या मासेमारी बोटीतून मासळी (Fish) उतरवली जात होती. ते पाहून अंजली रापणकारांकडे गेली आणि तिने सारी प्रक्रिया जाणून घेतली. विचारपूस करून रापणकारांना शाबासकी देताना, ‘तरूण मच्छिमारांनी त्यांचा वडिलोपार्जित व्यवसाय सुरू ठेवल्याचे पाहून खूप अभिमान वाटतो,’ असे 54 वर्षीय अंजलीने सांगितले. या मच्छिमारांवर देवाची कृपा असल्याचेही तिने नमूद केल्याची माहिती स्थानिक मच्छिमार पेले फर्नांडिसने ‘गोमन्तक’ला दिली.