IND vs ENG: दुसऱ्या कसोटीपूर्वी टीम इंडियात बदल! जडेजा-केएल राहुल संघाबाहेर, तर सर्फराजसह तिघांची रोहितसेनेत एन्ट्री

Ravindra Jadeja and KL Rahul: इंग्लंडविरुद्धच्या 5 सामन्यांच्या कसोटी मालिकेतील दुसऱ्या सामन्यापूर्वी भारतीय संघाला मोठा धक्का बसला आहे. रवींद्र जडेजानंतर आता स्टार खेळाडू केएल राहुलही बाहेर गेला आहे. हे दोघेही दुसऱ्या कसोटीतून बाहेर पडले आहेत. भारतीय क्रिकेट नियामक मंडळाने (बीसीसीआय) ही माहिती दिली आहे. भारत आणि इंग्लंड यांच्यातील पहिला कसोटी सामना 25 जानेवारीपासून हैदराबादमध्ये खेळला गेला होता. इंग्लंडने हा सामना 28 धावांनी जिंकला होता. आता दुसरा कसोटी सामना 2 फेब्रुवारीपासून विशाखापट्टणम येथे खेळवला जाणार आहे.

निवेदनात म्हटले आहे की, ''रवींद्र जडेजा आणि केएल राहुल यांना विशाखापट्टणम येथे होणाऱ्या इंग्लंडविरुद्धच्या दुसऱ्या कसोटीतून बाहेर पडावे लागले. हैदराबादमधील पहिल्या कसोटीच्या चौथ्या दिवशी जडेजाला दुखापत झाली होती, त्यानंतर राहुलनेही दुखापतीची तक्रार केली होती. बीसीसीआयचे वैद्यकीय पथक दोघांवर लक्ष्य ठेवून आहे.''

बीसीसीआयने सांगितले की, ''निवड समितीने सर्फराज खान, सौरभ कुमार आणि वॉशिंग्टन सुंदर यांचा भारतीय संघात समावेश केला आहे. गरज पडल्यास आवेश खानही कसोटी संघात सामील होईल.''

दरम्यान, जडेजा आणि राहुलच्या अनुउपस्थिती तीन खेळाडूंचे नशीब उजळले. स्टार फलंदाज सर्फराज खानशिवाय अष्टपैलू सौरभ कुमार आणि वॉशिंग्टन सुंदर यांचा भारतीय संघात समावेश करण्यात आला. सर्फराजने गेल्या काही वर्षांत देशांतर्गत क्रिकेटमध्ये अप्रतिम कामगिरी केली आहे. त्याने 45 प्रथम श्रेणी सामन्यांमध्ये 69.85 च्या उत्कृष्ट सरासरीने 3912 धावा केल्या आहेत. सर्फराजचा प्रथमच कसोटी संघात समावेश करण्यात आला आहे. पाच सामन्यांच्या मालिकेतील दुसरा कसोटी सामना 2 फेब्रुवारीपासून विशाखापट्टणम येथे खेळवला जाणार आहे.

दुसऱ्या कसोटीसाठी भारतीय संघ:

रोहित शर्मा (कर्णधार), शुभमन गिल, यशस्वी जयस्वाल, श्रेयस अय्यर, केएस भरत (यष्टीरक्षक), ध्रुव जुरेल (यष्टीरक्षक), रविचंद्रन अश्विन, अक्षर पटेल, कुलदीप यादव, मोहम्मद सिराज, मुकेश कुमार, जसप्रीत बुमराह (उपकर्णधार), आवेश खान, रजत पाटीदार, सरफराज खान, वॉशिंग्टन सुंदर आणि सौरभ कुमार.