Babar Azam: पाकिस्तान संघाचा कर्णधार आणि स्टार फलंदाज बाबर आझमने एक मोठी कामगिरी आपल्या नावावर केली आहे. बाबरने पुन्हा एकदा आयसीसी प्लेयर ऑफ द मंथचा पुरस्कार पटकावला आहे.
बाबरने अफगाणिस्तान आणि नेपाळविरुद्धच्या एकदिवसीय सामन्यांमध्ये उत्कृष्ट कामगिरी केल्याबद्दल ऑगस्ट 2023 चा ICC प्लेयर ऑफ द मंथ पुरस्कार जिंकला.
दरम्यान, बाबर आझमने (Babar Azam) ऑगस्ट 2023 मध्ये 4 डावात 64 च्या सरासरीने 264 धावा केल्या होत्या. या काळात बाबरने 2 अर्धशतके आणि एक शतक झळकावले.
एवढेच नाही तर बाबरच्या नेतृत्वाखाली पाकिस्तानने ऑगस्ट महिन्यातच अफगाणिस्तानविरुद्धची 3 सामन्यांची वनडे मालिका 3-0 ने जिंकली.
बाबर व्यतिरिक्त, शादाब खान आणि निकोलस पूरन हे देखील ICC प्लेयर ऑफ द मंथसाठी नामांकित खेळाडूंमध्ये होते.
बाबरने आपल्या कारकिर्दीत तिसऱ्यांदा हा पुरस्कार जिंकला आहे. जगातील अव्वल क्रमांकाचा फलंदाज बाबर आझमने 50 षटकांच्या फॉरमॅटमध्ये आपला दबदबा कायम राखला आहे. आयसीसी वनडे फलंदाजी क्रमवारीत बाबरचे 882 गुण आहेत.
पाकिस्तानी कर्णधार बाबर आझमला यापूर्वी एप्रिल 2021 आणि मार्च 2022 मध्ये ICC प्लेयर ऑफ द मंथचा किताब देण्यात आला होता.
हा पुरस्कार जिंकल्यानंतर आनंद व्यक्त करताना बाबरने आयसीसीला (ICC) दिलेल्या निवेदनात म्हटले होते की, माझ्या संघासाठी आणि माझ्यासाठी शेवटचा महिना खूप छान होता.
आशिया कपमध्ये पाकिस्तानी प्रेक्षकांसमोर खेळणे खूप अभिमानाची गोष्ट आहे आणि त्यात मी 150 धावाही करु शकलो. मी हा फॉर्म कायम ठेवण्याचा प्रयत्न करेन कारण आशिया कप सुरु आहे.
त्यानंतर एकदिवसीय विश्वचषक सुरु होण्यास खूप कमी कालावधी राहिला आहे, असे बाबर म्हणाला. मात्र, भारताविरुद्ध बाबर म्हणावी तशी कामगिरी करु शकला नाही.
बाबर आझमच्या वनडे कारकिर्दीवर नजर टाकली तर त्याने आतापर्यंत 107 एकदिवसीय सामन्यांमध्ये 58.48 च्या सरासरीने आणि 89.16 च्या स्ट्राईक रेटने 5380 धावा केल्या आहेत. यामध्ये बाबरने 19 शतके आणि 28 अर्धशतके झळकावली आहेत.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.