भारताचा स्टार भालाफेकपटू आणि दोन वेळचा ऑलिम्पिक पदक विजेता नीरज चोप्रा याच्या चाहत्यांसाठी निराशाजनक बातमी समोर आली आहे. दुखापतीमुळे नीरजने 2026 हंगामातील उर्वरित सर्व स्पर्धांमधून माघार घेण्याचा निर्णय घेतला आहे. त्यामुळे जपानमध्ये होणाऱ्या एशियन गेम्स 2026 मध्येही तो सहभागी होणार नसल्याचे स्पष्ट झाले आहे.
नीरजने स्वतः सोशल मीडियाच्या माध्यमातून आपल्या दुखापतीची माहिती दिली. त्याच्या या निर्णयामुळे भारतीय अॅथलेटिक्सला मोठा धक्का बसला असून आगामी मोठ्या स्पर्धांमधील भारताच्या पदकाच्या आशांवर परिणाम होण्याची शक्यता आहे.
नीरज चोप्राच्या माहितीनुसार, ट्रेनिंगदरम्यान त्याच्या घोट्याला दुखापत झाली. तपासणीनंतर घोट्यातील लिगामेंट टियर झाल्याचे समोर आले. डॉक्टर आणि आपल्या टीमशी चर्चा केल्यानंतर उर्वरित हंगामात स्पर्धा न खेळण्याचा निर्णय घेण्यात आला.
नीरज नुकताच लुसाने येथे झालेल्या डायमंड लीग स्पर्धेत सहभागी झाला होता. या स्पर्धेत त्याने 88.05 मीटरचा हंगामातील सर्वोत्तम थ्रो नोंदवला होता. त्यानंतर तो पुन्हा चांगल्या लयीत येत असल्याची चर्चा सुरू होती. मात्र दुखापतीमुळे त्याच्या 2026 च्या पुढील स्पर्धांवर पूर्णविराम लागला आहे.
या निर्णयामुळे नीरज चोप्रा केवळ एशियन गेम्समधूनच नव्हे, तर डायमंड लीग फायनलसह या हंगामातील इतर सर्व महत्त्वाच्या स्पर्धांमध्येही खेळताना दिसणार नाही.
भारतासाठी एशियन गेम्समध्ये नीरज हा सुवर्णपदकाचा प्रमुख दावेदार मानला जात होता. त्याच्या अनुपस्थितीमुळे भारतीय संघाला भालाफेक प्रकारात मोठी उणीव जाणवू शकते.
सोशल मीडियावर माहिती देताना नीरजने दुखापतीमुळे निराशा झाल्याचे मान्य केले. लुसानेतील दमदार कामगिरीनंतर आपल्याला योग्य लय आणि आत्मविश्वास मिळत असल्याची भावना त्याने व्यक्त केली होती.
मात्र खेळाडूच्या कारकिर्दीत अडथळे येत असतात आणि त्यावर मात करणे हा प्रवासाचाच भाग असल्याचेही त्याने सांगितले. आता त्याचे संपूर्ण लक्ष दुखापतीतून पूर्णपणे सावरण्यावर आणि भविष्यात अधिक ताकदीने मैदानात पुनरागमन करण्यावर असणार आहे.
नीरज चोप्रा हा भारतातील सर्वात यशस्वी अॅथलीट्सपैकी एक आहे. ऑलिम्पिकमध्ये दोन पदके जिंकून त्याने भारतीय क्रीडा इतिहासात विशेष स्थान निर्माण केले आहे. त्यामुळे कोणत्याही मोठ्या आंतरराष्ट्रीय स्पर्धेत त्याच्याकडून पदकाची अपेक्षा असते.
एशियन गेम्स 2026 मध्ये नीरजच्या अनुपस्थितीमुळे भारताच्या अॅथलेटिक्स संघाला मोठा धक्का बसला आहे. मात्र सध्या नीरजसाठी दुखापतीतून पूर्णपणे बरा होणे हेच सर्वात महत्त्वाचे आहे.
चाहत्यांनीही त्याच्या पोस्टनंतर त्याला लवकर बरे होण्यासाठी शुभेच्छा दिल्या आहेत. आता सर्वांचे लक्ष नीरज चोप्रा कधी मैदानात पुनरागमन करतो आणि पुढील हंगामात किती दमदार कामगिरी करतो, याकडे लागले आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.