KKR Captain Nitish Rana Fined: इंडियन प्रीमियर लीग 2023 स्पर्धेत 61 वा सामना रविवारी (14 मे) चेन्नई सुपर किंग्स विरुद्ध कोलकाता नाईट रायडर्स संघात झाला. एमए चिदंबरम स्टेडियमवर झालेल्या या सामन्यात कोलकाता नाईट रायडर्स संघाने 6 विकेट्सने विजय मिळवला.
पण असे असले तरी कोलकाताचा कर्णधार नितीश राणाला या सामन्यानंतर बीसीसीआयने केलेल्या कारवाईला सामोरे जावे लागले आहे. या सामन्यात कोलकाता संघाकडून षटकांची गती कमी राखल्याने म्हणजेच निर्धारित वेळेत षटके पूर्ण न केल्याने राणावर 24 लाख रुपयांचा दंड ठोठावण्यात आला आहे.
तसेच त्या सामन्यात खेळलेल्या कोलकाताच्या खेळाडूंनाही दंडाच्या कारवाईला सामोरे जावे लागले आहे. त्यांना 6 लाखाचा किंवा सामना शुल्काच्या 25 टक्के, यातील जो कमी असेल तो दंड भरावा लागणार आहे. याबद्दल बीसीसीआयने जाहीर केलेल्या प्रसिद्धी पत्रकात माहिती दिली आहे.
या सामन्यात षटकांच्या गतीच्या नव्या नियमानुसार कोलकाताला पेनल्टीलाही सामोरे जावे लागले होते. त्यांना अखेरच्या षटकात केवळ चार क्षेत्ररक्षकच 30 यार्ड सर्कलच्या बाहेर ठेवता आले होते. या कारणामुळे नितीश राणाने पंचांशी वादही घातला होता.
आयपीएलच्या नव्या नियमानुसार संघांनी निर्धारित वेळत षटके टाकली नाहीत, तर उशीराने टाकलेल्या प्रत्येक षटकासाठी संघांना कारवाई म्हणून केवळ चारच क्षेत्ररक्षक 30 यार्ड सर्कलच्या बाहेर ठेवता येणार आहेत.
दरम्यान, कोलकाता संघाकडून आयपीएल 2023 मध्ये कोलकाताकडून षटकांची गती कमी राखण्याची चूक दुसऱ्यांदा झाली आहे. यापूर्वी ईडन गार्डन्सवर झालेल्या पंजाब किंग्सविरुद्धच्या सामन्यातही कोलकाताकडून षटकांची गती कमी राखल्याबद्दल राणाला 12 लाखांच्या दंडाला सामोरे जावे लागले होते.
दरम्यान आयपीएलच्या नियमानुसार संघाकडून षटकांची गती कमी राखण्याची चूक तिसऱ्यांदा झाल्यास संघाच्या कर्णधारावर 30 लाखांचा दंड आणि एका सामन्याची बंदी अशी कारवाई केली जाते.
तसेच संघातील खेळाडूंवर 12 लाखांचा किंवा सामनाशुल्काच्या 50 टक्के, जी किंमत कमी असेल, तो दंड भरावा लागतो. हीच कारवाई नंतर प्रत्येक षटकांची गती कमी राखण्याच्या चूकीसाठी लागू होते.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.