पेडे-म्हापसा : गतविजेत्या झारखंडचे गुजरातवर वीस गोल

पणजी : राष्‍ट्रीय सबज्युनियर हॉकी स्पर्धेत गतविजेत्या झारखंडने अ गटात गुजरातवर २०-० फरकाने दणदणीत विजय नोंदविला. स्पर्धा पेडे-म्हापसा येथील ॲस्ट्रो टर्फ हॉकी मैदानावर सुरू आहे. स्पर्धेत अन्य लढतीत ब गटात हरियानाने कर्नाटकचा ६-१ फरकाने पाडाव केला. उत्तर प्रदेशने क गटात तमिळनाडूचा २१-० फरकाने धुव्वा उडविला. ड गटात मणिपूरने राजस्थानला १३-० असे लीलया हरविले. ( Jharkhand scored 20 goals against Gujarat)

झारखंडच्या सलग दुसऱ्या विजयात अभिषेक टिग्गा याने पाच गोल केले. याशिवाय बिशा लाक्रा याने चार, अमृत तिर्की याने तीन, तसेच अदिसान मिंज, रोहित प्रधान, अमित सोरेंग, अभिषेक तिर्की, असिम एक्का, अभिषेक कुजूर, रोहित तिर्की यांनी प्रत्येकी एक गोल केला. हरियानाच्या विजयात सुनील याने तीन, साहिल, नितीन, राहुल यांनी प्रत्येकी एक गोल केला. हर्षित कुमार याने कर्नाटकचा एकमात्र गोल नोंदविला.

उत्तर प्रदेशच्या धडाकेबाज विजयात आकाश पाल व शिवम पटेल यांनी प्रत्येकी चार, मनोज यादवने तीन, अजित यादव, महंमद झैद खान, त्रिलोकी व्हेन्वांशी यांनी प्रत्येकी दोन, राहुल यादव, शाहरुख अली, रझा अली, विशाल पांडे यांनी प्रत्येकी एक गोल केला. बोरिस सिंग व टी. बिक्रमजित सिंग यांचे प्रत्येकी चार, तसेच एस. सॅन्सन सिंग, एस. बोरिस मेतेई, एल. मॅक्स सिंग, के. संजित सिंग, मोईरांगथेम बेनार्जित यांच्या प्रत्येकी एक गोलमुळे मणिपूर हॉकी ने राजस्थानला सहजपणे हरविले.