पणजीः एफसी गोवा (FC Goa) संघाने सोमवारपासून मोसमपूर्व सरावास (Pre-season Training) सुरवात केली. आगामी इंडियन सुपर लीग (Indian Super League) फुटबॉल स्पर्धेचे लक्ष्य बाळगून यंदा संघाने लवकर शिबिरास सुरवात केली. एफसी गोवाने साल्वादोर द मुंद (Salvador do Mundo) पंचायत मैदानावर सराव केंद्र केले आहे. स्पॅनिश हुआन फेरांडो सलग दुसऱ्या मोसमासाठी एफसी गोवाचे प्रशिक्षक आहेत. गतमोसमात त्यांच्या मार्गदर्शनाखाली एफसी गोवा संघाने आयएसएल स्पर्धेची उपांत्य (प्ले-ऑफ) फेरी गाठली होती, तसेच एएफसी चँपियन्स लीगमधील पदार्पणात चमकदार खेळ केला होता. नव्या मोसमासाठी कर्णधार एदू बेदिया, इव्हान गोन्झालेझ, आल्बर्टो नोगेरा, होर्गे ऑर्टिझ या स्पॅनिश खेळाडूंचा करार कायम असून इगोर आंगुलोच्या जागी नवा स्ट्रायकर व एक आशियाई सदस्य देशाचा खेळाडू करारबद्ध होणे बाकी आहे.
एफसी गोवाने नव्या मोसमासाठी स्थानिक खेळाडूंत स्पोर्टिंग क्लब द गोवा संघाचा बचावपटू कुणाल कुंडईकर व यूथ क्लब ऑफ मनोरा संघाचा मॅनूशॉन फर्नांडिस यांना करारबद्ध केले आहे. आगामी आयएसएल स्पर्धेपूर्वी एफसी गोवा संघ पुढील महिन्यात ड्युरँड कप स्पर्धेत सहभागी होण्याचे संकेत आहेत. एफसी गोवाचे मोसमपूर्व सराव शिबिर सोमवारपासून गोव्यातील, तसेच देशातील इतर भागातील खेळाडूंसह सुरू झाले. परदेशी खेळाडू कालांतराने सहभागी होणार आहेत. गतमोसमाप्रमाणे यंदाही आयएसएल स्पर्धा जैवसुरक्षा वातावरणात नोव्हेंबरपासून खेळली जाईल. आयोजकांनी सलग दुसऱ्या मोसमासाठी गोव्यात सामने खेळविण्यास पसंती दिली आहे. स्पर्धेची अधिकृत घोषणा अजून झालेली नाही.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
