IND vs AUS, 4th Test: तिसरा दिवस भारतीय फलंदाजांचा! गिलचं शानदार शतक, तर विराटनं ठोकली फिफ्टी

India vs Australia, 4th Test: अहमदाबाद येथील नरेंद्र मोदी स्टेडियमवर भारत विरुद्ध ऑस्ट्रेलिया संघात कसोटी मालिकेतील चौथा सामना सुरू आहे. शनिवारी या सामन्यातील तिसरा दिवस होता. या दिवशी भारतीय फलंदाजांचे वर्चस्व राहिले.

तिसऱ्या दिवसाखेर भारतीय संघाने 99 षटकात 3 बाद 289 धावा केल्या आहेत. भारताकडून विराट कोहली 59 धावांवर आणि रविंद्र जडेजा 16 धावांवर नाबाद आहे. दरम्यान, अद्याप भारतीय संघ 191 धावांनी पिछाडीवर आहे.

या सामन्यात तिसऱ्या दिवशी भारतीय संघाने 11 व्या षटकापासून आणि बिनबाद 36 धावांपासून पुढे खेळायला सुरुवात केली. भारताकडून सलामीवीर शुभमन गिल आणि कर्णधार रोहित शर्माने चांगला खेळ केला होता. त्यांनी सलामीला अर्धशतकी भागीदारीही केली. मात्र, 21 व्या षटकात मॅथ्यू कुहनेमन याने रोहितला 35 धावांवर माघारी धाडले. त्यामुळे रोहित आणि गिल यांची 74 धावांची सलामी भागीदारीही तुटली.

पण, त्यानंतर चेतेश्वर पुजाराने गिलला चांगली साथ दिली. एकीकडे गिलने काही आक्रमक शॉट खेळले, तर पुजाराने संयमी खेळ केला. त्यांनी शतकी भागीदारी करत ऑस्ट्रेलियन गोलंदाजांना चांगलेच दमवले.

त्यांच्या शतकी भागीदारी दरम्यान 62 व्या षटकात टॉड मर्फीविरुद्ध दुसऱ्या चेंडूवर गिलने चौकार ठोकत त्याचे दुसरे शतक साजरे केले. पण याच षटकाच्या अखेरच्या चेंडूवर मर्फीने पुजाराला 42 धावांवर पायचीत पकडले. त्यामुळे पुजाराला माघारी जावे लागले. गिल आणि पुजारा यांच्यात 113 धावांची भागीदारी झाली.

पुजारा बाद झाल्यानंतर गिलने अनुभवी विराट कोहलीला साथीला घेतले. फलंदाजीला पोषक असलेल्या या खेळपट्टीवर या दोघांनीही चांगली भागीदारी रचण्यास सुरुवात केली. त्यांनी बघता बघता अर्धशतकी भागीदारीही पूर्ण केली.

मात्र, गिलला 79 व्या षटकात लायनने पायचीत करत माघारी धाडले आणि भारताला मोठा धक्का दिला. गिलने 235 चेंडूत 128 धावांची खेळी केली. या खेळीत त्याने 12 चौकार आणि 1 षटकार मारला.

गिलची विकेट गेल्यानंतर विराट आणि पाचव्या क्रमांकावर फलंदाजीला आलेल्या रविंद्र जडेजाने तिसऱ्या दिवसाखेरपर्यंत ऑस्ट्रेलियाला यश मिळू दिले नाही. त्यामुळे हे दोघेही तिसऱ्या दिवसाखेर नाबाद 44 धावांची भागीदारी करत नाबाद राहिले.