IND vs AUS 3rd Test: जिद्दी स्टार्क! बोटातून रक्त येत होते, तरीही तो बॉलिंग करत राहिला...; Video Viral

Mitchell Starc Bowls despite Bleeding Finger: इंदूरमधील होळकर क्रिकेट स्टेडियमवर भारत विरुद्ध ऑस्ट्रेलिया संघात सुरु असलेल्या तिसऱ्या कसोटी सामन्यात भारताने ऑस्ट्रेलियासमोर 76 धावांचे आव्हान ठेवले आहे.

दरम्यान, या सामन्यात ऑस्ट्रेलियाचा अनुभवी वेगवान गोलंदाज मिशेल स्टार्कने बोटातून रक्त येत असतानाही गोलंदाजी करण्याची जिद्द दाखवली.

झाले असे की सामन्याच्या दुसऱ्या दिवशी (2 मार्च) ऑस्ट्रेलियाचा पहिला डाव 197 धावांवर संपल्यानंतर भारतीय संघ दुसऱ्या डावात फलंदाजीसाठी उतरला. भारताकडून रोहित शर्मा आणि शुभमन गिल यांनी डावाची सुरुवात केली, तर ऑस्ट्रेलियाकडून गोलंदाजीची सुरुवात मिशेल स्टार्कने केली.

पण पहिल्याच षटकात गोलंदाजी करत असताना मिशेल स्टार्कच्या तर्जनीतून रक्त येत होते. पण त्याने तरीही षटक पूर्ण करण्याला प्राधान्य दिले. त्याच्या बोटातून येणाऱ्या रक्ताचे डाग त्याच्या जर्सीवरही पडलेले दिसून येत होते.

विशेष म्हणजे स्टार्कने या डावात नंतरही गोलंदाजी करणे सुरू ठेवले. त्याने आक्रमक अंदाजात फलंदाजी करणाऱ्या श्रेयस अय्यरला 26 धावांवर बादही केले. त्यामुळे सध्या स्टार्कने दाखवलेल्या जिद्दीने कौतुक होत आहे.

पूर्ण तंदुरुस्त नसतानाही संघासाठी उतरला मैदानात

खरंतर स्टार्कला दोन महिन्यांपूर्वीच बोटाची दुखापत झाली होती. त्यामुळे तो भारताविरुद्धच्या पहिल्या दोन कसोटीत खेळलाही नव्हता. मात्र, तिसऱ्या कसोटीतून पॅट कमिन्स, जोश हेजलवूड हे दोघेही बाहेर पडले असल्याने स्टार्कने बोटाच्या दुखापतीतून पूर्ण तंदुरुस्त नसतानाही खेळण्याची तयारी दाखवली.

त्यामुळे त्याला तिसऱ्या कसोटीसाठी ऑस्ट्रेलियाच्या प्लेइंग इलव्हनमध्ये सामील करण्यात आले. त्याच्या समावेशाने ऑस्ट्रेलियाच्या गोलंदाजीली अनुभवाचीही साथ मिळाली आहे.

सामन्याचा थोडक्यात तपशील

दरम्यान, या कसोटी सामन्याबद्दल सांगायचे झाल्यास भारताचा पहिला डाव 109 धावांवरच संपुष्टात आला होता. ऑस्ट्रेलियाकडून मॅथ्यू कुहनेमनने 5 विकेट्स घेतल्या होत्या.

तसेच ऑस्ट्रेलियाने उस्मान ख्वाजाच्या 60 धावांच्या खेळीच्या जोरावर 197 धावा करत 88 धावांची आघाडी घेतली. भारताकडून रविंद्र जडेजाने 4 विकेट्स, तर आर अश्विन आणि उमेश यादव यांनी प्रत्येकी 3 विकेट्स घेतल्या.

भारतीय फलंदाजांना दुसऱ्या डावातही खास काही करता आले नाही. चेतेश्वर पुजाराचा अपवाद वगळता अन्य भारतीय फलंदाज मोठी खेळी करण्यात अपयशी ठरले.

त्यामुळे भारताचा दुसरा डाव 60.3 षटकात 163 धावांवरच संपला आणि भारताने ऑस्ट्रेलियासमोर 76 धावांच आव्हान ठेवले. ऑस्ट्रेलियाकडून या डावात नॅथन लायनने 8 विकेट्स घेतल्या.