India vs England, 3rd Test at Rajkot:
भारत विरुद्ध इंग्लंड संघात राजकोटमध्ये गुरुवारपासून कसोटी मालिकेतील तिसरा सामना खेळवला जात आहे. या सामन्याच्या चौथ्या दिवशी म्हणजेच रविवारी (18 फेब्रुवारी) भारतीय संघाने दुसरा डाव 98 षटकात 4 बाद 430 धावांवर घोषित केला. यासह पहिल्या डावातील 126 धावांच्या आघाडीमुळे भारताने इंग्लंडसमोर 557 धावांचे लक्ष्य ठेवले.
भारताकडून या डावात यशस्वी जयस्वाल 214 धावांवर नाबाद राहिला, तसेच सर्फराज खान 68 धावांवर नाबाद राहिला. त्याआधी शुभम गिलनेही 91 धावांची खेळी केली.
या सामन्यात चौथ्या दवशी भारताने दुसऱ्या डावात 52 व्या षटकापासून आणि 2 बाद 196 धावांपासून पुढे खेळायला सुरुवात केली. यावेळी शुभमन गिल 65 धावांवर, तर कुलदीप यादव 3 धावांवर नाबाद होता.
कुलदीप आणि गिल या दोघांनी चांगली सुरुवात करत भारताचा डाव पुढे नेला. त्यावेळी गिल शतक करेल, अशी अनेकांची अपेक्षा असेल. त्याने चांगले खेळत नव्वदीत प्रवेशही केला होता.
परंतु, 64 व्या षटकात एकेरी धाव घेण्याच्या प्रयत्नात त्याच्यात आणि कुलदीपमध्ये गोंधळ झाला. त्यावेळी स्टोक्सच्या थ्रोवर टॉम हर्टलीने गिल क्रिजमध्ये पोहण्याआधी बेल्स उडवले. त्यामुळे गिल 151 चेंडूत 91 धावा करून माघारी परतला.
त्यानंतर तिसऱ्या दिवशी शतक केल्यानंतर पाठीतील वेदनेमुळे रिटायर्ड हर्ट होऊन माघारी परतलेला यशस्वी जयस्वाल पुन्हा फलंदाजीला आला. त्याने त्याच्या 104 धावांपासून पुढे खेळायला सुरुवात केली. त्याने तिसऱ्या दिवसाचीच लय चौथ्यादिवशीही कायम ठेवत फटकेबाजी केली. त्याने आक्रमक खेळ केला.
दरम्यान 72 व्या षटकात कुलदीपला रेहान अहमदने 27 धावांवर बाद केले. त्यानंतर आक्रमक खेळणाऱ्या जयस्वालने 85 व्या षटकात तर जेम्स अँडरसन विरुद्ध सलग 3 षटकार मारले. त्याने नंतर त्याचे द्विशतकही पूर्ण केले. जयस्वालने या मालिकेत सलग दुसऱ्यांदा द्विशतक केले. त्याचबरोबर त्याने या मालिकेत 500 धावांचा आकडाही पार केला.
जयस्वालला सर्फराज खाननेही चांगली साथ दिली. सर्फराजनेही चांगली फटकेबाजी केली. त्यानेही पदार्पणाच्या या सामन्यात दुसऱ्या डावातही अर्धशतक झळकावले. जयस्वालचे द्विशतक आणि सर्फराजचे अर्धशतक झाल्यानंतर भारताचा कर्णधार रोहितने दुसरा डाव घोषित केला.
सर्फराज आणि जयस्वाल यांच्यात 172 धावांची नाबाद भागीदारी झाली. जयस्वालने 236 चेंडूत 214 धावांवर नाबाद राहिला. तसेच सर्फराज 72 चेंडूत 68 धावांवर नाबाद राहिला. दरम्यान, या डावात तिसऱ्या दिवशी रोहित शर्मा 19 धावांवर आणि रजत पाटीदार शुन्यावर बाद झाले होते.
इंग्लंडकडून दुसऱ्या डावात रेहान अहमद, मार्क वूड आणि जो रुट यांना प्रत्येकी 1 विकेट मिळाली.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
