Asian Games 2023: भारतीय नेमबाजांचा 'सुवर्ण'वेध, वर्ल्ड रेकॉर्डलाही घातली गवसणी

India's 1st Gold Medal at 19th Asian Games Hangzhou, China: आशियाई क्रीडा स्पर्धा सध्या चीनमधील होंगझाऊ येथे सुरू आहे. या स्पर्धेचे यंदा १९ वे पर्व असून भारताच्या खात्यात पहिले सुवर्णपदक जमा झाले आहे.

भारताला पहिल्या दिवशी रोइंगमध्ये तीन आणि नेमबाजीत दोन असे एकूण ५ पदके मिळाली होती. आता भारताला दुसऱ्या दिवसाच्या (२५ सप्टेंबर) सुरुवातीलाच सुवर्णपदक मिळाले आहे.

भारताकडून पुरुषांच्या १० मीटर एअर रायफल प्रकारात भारतीय संघाने सुवर्ण वेध घेतला आहे. या भारतीय संघात दिव्यांश पनवार, ऐश्वर्य तोमर आणि रुद्रांक्ष पाटील यांचा समावेश आहे.

दिव्यांश पनवार, ऐश्वर्य तोमर आणि रुद्रांक्ष पाटील या तिघांनी मिळून केवळ सुवर्णपदकच जिंकले नाही, तर त्यांनी नवा विश्वविक्रमही रचला आहे.

त्यांनी १० मीटर एअर रायफल सांघिक प्रकारात सर्वाधिक स्कोअर करण्याचा विश्वविक्रम केला आहे. त्यांचा अंतिम सामन्यात १८९३.७ इतका स्कोअर होता.

याच प्रकारात कोरियाने १८९०.१ स्कोअर करत रौप्य पदक जिंकले, तसेच चीनने १८८८.२ स्कोअर करत कांस्य पदक जिंकले.

दरम्यान लक्षात घेण्यासारखी गोष्ट अशी की ऐश्वर्य तोमर आणि रुद्रांक्ष पाटील या दोघांनी पुरुषांच्या १० मीटर एअर रायफल प्रकारात एकेरीत अंतिम फेरीही गाठली आहे.

खरंतर दिव्यांश पनवार देखील अंतिम फेरीसाठी पात्र ठरला आहे, मात्र एका देशाचे केवळ दोनच खेळाडू अंतिम सामना खेळू शकत असल्याने पनवारला हा अंतिम सामना खेळता येणार नाही.

दरम्यान, भारताने दुसऱ्या दिवशी रोइंगमधील आणखी दोन पदकेही जिंकले. चार जणांच्या सांघिक प्रकारात भारताला कांस्य पदक मिळाले आहे.

भारताच्या संघात जसविंदर सिंग, भीम सिंग, पुनित कुमार आणि आशिष यांचा समावेश होता. त्यांनी ६:१०.८१ सेकंदाची वेळ नोंदवत कांस्य पदक जिंकले. या प्रकारात उझबेकिस्तानच्या संघाने सुवर्णपदक, तर चीनच्या संघाने रौप्यपदक जिंकले.

तसेच पुरुषांच्या क्वाड्रपल स्कल प्रकारात भारतीय संघाने कांस्य पदक जिंकले आहे. भारतीय संघात सतनाम सिंग, परमिंदर सिंग, सुखमीत आणि जकर खान यांचा समावेश होता. त्यांनी ६:०८.६१ सेंकद वेळ नोंदवली. या प्रकारात चीनला सुवर्णपदक मिळाले, तर उझबेकिस्तानच्या संघाने रौप्य पदक जिंकले.