U-19 World Cup: भारताने रविवारी अंडर-19 विश्वचषक स्पर्धेतील शेवटच्या ग्रुप स्टेज सामन्यात अमेरिकेचा 201 धावांनी पराभव केला. या स्पर्धेतील भारताचा हा सलग तिसरा विजय आहे. यापूर्वी, संघाने बांगलादेश आणि आयर्लंडला पराभूत केले होते.
अर्शिन कुलकर्णीच्या शतकी खेळीच्या जोरावर भारताने प्रथम फलंदाजी करताना 50 षटकांत 5 गडी गमावून अमेरिकेविरुद्ध 326 धावांची मोठी धावसंख्या उभारली होती. प्रत्युत्तरात अमेरिकेचा संघ 50 षटकांत 8 गडी गमावून केवळ 125 धावा करु शकला. भारताकडून नमन तिवारीने 4 बळी घेतले. यासह भारताने अंडर-19 विश्वचषकाच्या सुपर-6 टप्प्यात प्रवेश केला आहे. भारत अ गटात 6 गुणांसह अव्वल स्थानावर आहे.
दरम्यान, 327 धावांच्या लक्ष्याचा पाठलाग करताना अमेरिकेची सुरुवात खराब झाली. संघाने 10 षटकांत तीन विकेट गमावल्या. सलामीवीर प्रणव चेट्टीपलायम (2) आणि भव्य मेहता (0) खाते न उघडता पॅव्हेलियनमध्ये परतले. 18 चेंडूत 8 धावा करुन कर्णधार ऋषी बाद झाला. सिद्धार्थ कप्पाने 60 चेंडूत 18 धावा केल्या. उत्कर्षने 73 चेंडूत 40 धावांची खेळी केली. तर मानवला खाते उघडता आले नाही. पार्थने दोन धावा केल्या. नाडकर्णी 20 धावा करुन बाद झाला.
दुसरीकडे, फलंदाजीसाठी आमंत्रण दिल्यानंतर गतविजेत्या भारताने अपेक्षेप्रमाणे फलंदाजीत वर्चस्व राखले. तथापि, डावाच्या अखेरीस भारतीय संघ ढेपाळला. अमेरिकन गोलंदाजांनी ठराविक अंतराने विकेट्स घेतल्या. डावखुरा फलंदाज अर्शिनने 118 चेंडूंच्या खेळीत आठ चौकार आणि तीन षटकार मारले. सर्फराज खानचा धाकटा भाऊ मुशीरने 76 चेंडूंत सहा चौकार आणि एक षटकार ठोकला. या दोघांनी मिळून 155 धावांची महत्त्वपूर्ण भागीदारीही केली.
मुशीर बाद झाल्यानंतर अर्शिनने भारताचा डाव सावरला. त्याला 14व्या षटकात 16 धावांवर जीवदान मिळाले आणि त्याचा पुरेपूर फायदा घेत त्याने शानदार शतक झळकावले. फिरकीपटू ऋषी रमेशने 36 व्या षटकात मुशीरची महत्त्वपूर्ण विकेट घेतली. काही षटकांनंतर अमेरिकेने कर्णधार उदय सहारन (27 चेंडूत 35 धावा) आणि अर्शिन यांना सलग सहा चेंडूंत पॅव्हेलियनमध्ये पाठवले. सचिन धस (20), प्रियांशु मोलिया (नाबाद 27) आणि अरावेली अविनाश (नाबाद 12) यांनी भारताची धावसंख्या 300 धावांच्या पुढे नेली.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.