Rohit Sharma: 'सध्या तरी सर्वोत्तम खेळतोय, पण ज्या दिवशी...' निवृत्तीबद्दल रोहित शर्माने स्पष्टच सांगितलं

Rohit Sharma on His Retirement:

भारतीय क्रिकेट संघाने इंग्लंडविरुद्ध धरमशाला येथे झालेल्या कसोटी मालितेतील पाचव्या सामन्यात एक डाव आणि 64 धावांनी विजय मिळवला. या विजयासह भारताने पाच सामन्यांच्या मालिकेत 4-1 अशा फरकाने विजय मिळवला.

या मालिकेतील पहिला सामना भारताने गमावला होता, पण त्यानंतर सलग चारही सामन्यात भारताने विजय मिळवत मालिकाही जिंकली.

तथापि, पहिल्या सामन्यातील भारताच्या पराभवानंतर इंग्लंडचे जॉफ्री बॉयकॉट यांनी रोहितचा सर्वोत्तम काळ संपल्याचे भाष्य केले होते. ज्यानंतर रोहितने शानदार कामगिरी केली आणि या टीकेला आपल्या कामगिरीतून उत्तर दिले. रोहितने या मालिकेत 9 डावात दोन शतकांसह 400 धावा केल्या.

दरम्यान, मालिकेनंतर जिओ सिनेमाच्या शोमध्ये दिनेश कार्तिकशी चर्चा करताना रोहितने त्याच्या निवृत्तीबद्दलही भाष्य केले.

तो म्हणाला, 'मला वाटते, ज्या दिवशी मी सकाळी उठेल आणि मला वाटेल की मी आता सर्वोत्तम कामगिरी करू शकत नाही, मला जेव्हा वाटेल की खेळणे आता बस झालं, तेव्हा मी याबद्दल भाष्य करेल आणि सर्वांनाही याबद्दल सांगेल. पण खंर सांगू का, मला वाटते की गेल्या दोन-तीन वर्षात माझ्यातील क्रिकेटचा स्थर उंचावला आहे आणि मी सर्वोत्तम क्रिकेट खेळत आहे.'

त्याचबरोबर त्याच्या खेळण्याच्या दृष्टीकोनाबद्दल रोहित म्हणाला, 'लोक आकड्यांकडे पाहात नाही, लोक वैयक्तिक खेळी पाहात नाही. तुमचा खेळ खेळा. तुम्ही जर चांगले खेळलात, तर आकडेवारी आपोआप चांगली राहिल.'

रोहित पुढे म्हणाला, 'जर तुम्ही निर्भीड असाल, जर तुमचे विचार स्वच्छ आणि स्पष्ट असतील, तर गोष्टी आपोआप तुमच्या बाजूने घडतील. पण त्यासाठी वेगळे प्रयत्न करू नका. मैदानात जाऊन मी 50-100 धावा करू शकतो का विचार करणे, सहाजिक आहे, ते आकडे चांगलेच आहेत. पण तरी त्याचे विचार झटकून खेळावर लक्ष केंद्रित करणे महत्त्वाचे आहे.'

याशिवाय या मालिकेत वरिष्ठ खेळाडूंच्या उपस्थितीत युवा खेळाडूंनी केलेल्या कामगिरीबद्दलही रोहितने कौतुक केले, तसेच त्यांना योग्य पद्धतीने सांभाळायला हवे, असेही म्हटले.

दरम्यान, या मालिकेमुळे भारताने सध्यातरी वर्ल्ड टेस्ट चॅम्पियनशीप 2023-25 या स्पर्धेच्या गुणतालिकेतील पहिले स्थान भक्कम केले आहे