भारत आणि न्यूझीलंड यांच्यात सुरू असलेल्या टी-२० मालिकेदरम्यान भारतीय संघासाठी चिंतेची बातमी समोर आली आहे. स्टार यष्टीरक्षक फलंदाज ईशान किशन दुखापतीतून पूर्णपणे सावरला नसल्याने तिसऱ्या टी-२० सामन्यासाठी उपलब्ध असणार नाही. भारतीय क्रिकेट नियामक मंडळाने (BCCI) याबाबत अधिकृत माहिती दिली आहे. यापूर्वीही दुखापतीमुळे ईशानला दुसऱ्या सामन्याला मुकावे लागले होते. त्यामुळे आता तिसऱ्या सामन्यातही त्याची अनुपस्थिती भारतीय संघासाठी महत्त्वाची ठरणार आहे.
ईशान किशनला मालिकेतील पहिल्या टी-२० सामन्यादरम्यान क्षेत्ररक्षण करताना दुखापत झाली होती. त्याला मांडीच्या आतील भागातील स्नायूंना किरकोळ स्वरूपाचा ताण (लो-ग्रेड अॅडक्टर स्ट्रेन) आल्याचे सांगण्यात आले. या दुखापतीमुळे त्याला पहिल्या सामन्यात फलंदाजीसाठी खालच्या क्रमांकावर उतरावे लागले होते. त्यानंतर दुसऱ्या सामन्यापूर्वी तो पूर्णपणे तंदुरुस्त होऊ शकला नाही. परिणामी, त्याला त्या सामन्यातून विश्रांती देण्यात आली.
दुसऱ्या सामन्याच्या वेळी ईशान किशन केवळ त्या सामन्यासाठी अनुपलब्ध असल्याची माहिती देण्यात आली होती. मात्र, दुखापतीतून सावरण्यासाठी त्याला आणखी वेळ लागणार असल्याचे आता स्पष्ट झाले आहे. त्यामुळे २७ ऑक्टोबर रोजी होणाऱ्या तिसऱ्या टी-२० सामन्यातही तो खेळू शकणार नाही.
बीसीसीआयच्या माहितीनुसार, वैद्यकीय पथक ईशानच्या प्रकृतीवर लक्ष ठेवून आहे. त्याच्या दुखापतीतून होणाऱ्या प्रगतीचा नियमित आढावा घेतला जात आहे. तो पूर्णपणे तंदुरुस्त झाल्यानंतरच त्याच्या पुनरागमनाबाबत पुढील निर्णय घेतला जाईल. दरम्यान, ईशानच्या पर्यायी खेळाडूच्या रूपात कुमार कुशाग्रचा एका सामन्यासाठी भारतीय टी-२० संघात समावेश करण्यात आला होता. ईशान तिसऱ्या सामन्यासाठी उपलब्ध नसला, तरी तो भारतीय संघासोबत प्रवास करणार असल्याचे वृत्तात नमूद करण्यात आले आहे.
भारत आणि न्यूझीलंड यांच्यात पाच सामन्यांची टी-२० मालिका खेळवली जात आहे. मालिकेतील पहिल्या दोन सामन्यांत विजय मिळवत भारतीय संघाने २-० अशी आघाडी घेतली आहे. त्यामुळे तिसऱ्या सामन्यात विजय मिळवल्यास भारताला मालिकेत ३-० अशी निर्णायक आघाडी घेता येईल.
दुसरीकडे, मालिकेतील आव्हान कायम ठेवण्यासाठी न्यूझीलंडला पुढील तीनही सामने जिंकण्याची गरज असेल. त्यामुळे तिसरा सामना दोन्ही संघांसाठी महत्त्वाचा ठरणार आहे. भारतीय संघाला विजयी लय कायम ठेवण्याची संधी असली, तरी ईशानच्या अनुपस्थितीत संघरचनेत बदल करावा लागू शकतो.
वेलिंग्टनच्या मैदानावरील भारत आणि न्यूझीलंड यांच्यातील टी-२० सामन्यांचा इतिहास पाहता यजमान संघाला काही प्रमाणात आघाडी मिळालेली आहे. या मैदानावर दोन्ही संघांमध्ये झालेल्या चार सामन्यांपैकी न्यूझीलंडने दोन सामने जिंकले आहेत. भारताला एका सामन्यात विजय मिळाला, तर एक सामना डकवर्थ-लुईस-स्टर्न (DLS) पद्धतीनुसार टाय ठरला होता.
त्यामुळे तिसऱ्या सामन्यात विजय मिळवून भारताला मालिकेतील आघाडी वाढवण्यासोबतच या मैदानावरील आपली कामगिरी सुधारण्याचीही संधी असेल. आता ईशान किशनच्या अनुपस्थितीत भारतीय संघ कोणती रणनीती आखतो आणि न्यूझीलंड पुनरागमन करू शकतो का, याकडे क्रिकेट चाहत्यांचे लक्ष लागले आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.