I-League 2023-24, Shillong Lajong vs Churchill Brothers:
आय-लीग फुटबॉल स्पर्धेत सलग दुसऱ्या, तर एकंदरीत चौथ्या पराभवामुळे गोव्याच्या चर्चिल ब्रदर्सची नवव्या क्रमांकावर घसरण झाली आहे. मेघालयातील शिलाँग येथे बुधवारी झालेल्या लढतीत त्यांना शिलाँग लाजाँग एफसीने 2-0 फरकाने हरविले.
घरच्या मैदानावर शिलाँग लाजाँगला सलग चौथा विजय मिळवून देताना लैवांग बोह्हम याने 45 व्या, तर रेनन पॉलिनो याने 51 व्या मिनिटास पेनल्टी फटक्यावर गोल केला.
शिलाँग लाजाँगने आठ लढतीत चार विजय व तेवढ्याच बरोबरीसह १६ गुणांची कमाई केली आहे. त्यांचे व श्रीनिदी डेक्कन संघाचे समान गुण आहे. गोलसरासरीत शिलाँगच्या संघाला तिसरा क्रमांक मिळाला.
चर्चिल ब्रदर्सला मागील लढतीत दिल्ली एफसीकडून 1-2 फरकाने हार स्वीकारावी लागली होती. बुधवारच्या पराभवामुळे माजी विजेता संघ पदावनती विभागात आला आहे. त्यांचे आठ लढतीतून आठ गुण झाले आहेत. दोन विजय, दोन बरोबरी व चार पराभव अशी त्यांची कामगिरी आहे.
चर्चिल ब्रदर्सचा पुढील सामना 10 डिसेंबर रोजी नेरोका एफसीविरुद्ध खेळला जाईल.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
