हॉकी वर्ल्ड कप 2026 मधील भारतीय पुरुष हॉकी संघाचा प्रवास निराशाजनक पराभवाने संपला आहे. सातव्या स्थानासाठी झालेल्या अखेरच्या सामन्यात भारताला बेल्जियमविरुद्ध पेनल्टी शूटआऊटमध्ये 3-4 असा पराभव स्वीकारावा लागला. निर्धारित वेळेत दोन्ही संघांनी प्रत्येकी तीन गोल करत सामना 3-3 असा बरोबरीत ठेवला होता. मात्र शूटआऊटमध्ये बेल्जियमने सरशी करत विजयावर शिक्कामोर्तब केले.
या पराभवानंतर भारतीय संघाला स्पर्धेत आठव्या स्थानावर समाधान मानावे लागले. भारताकडून कर्णधार हरमनप्रीत सिंगने दोन महत्त्वाचे गोल केले, तर अभिषेकने एक गोल नोंदवत संघाला सामन्यात कायम ठेवले. मात्र शेवटच्या क्षणी झालेल्या काही चुका भारतासाठी महागात पडल्या.
सामन्याच्या सुरुवातीपासूनच भारतीय संघाने आक्रमक खेळ करत बेल्जियमवर दबाव निर्माण केला. सहाव्या मिनिटाला अभिषेकने गोल करत भारताला 1-0 अशी आघाडी मिळवून दिली.
मात्र त्यानंतर मैदानावर निर्धारित संख्येपेक्षा जास्त खेळाडू असल्याच्या कारणामुळे भारताला फटका बसला. या घटनेनंतर कर्णधार हरमनप्रीत सिंगला यलो कार्ड दाखवण्यात आले आणि त्याला पाच मिनिटांसाठी मैदानाबाहेर जावे लागले. तरीही पहिल्या क्वार्टरमध्ये भारतीय बचावफळीने प्रभावी कामगिरी केली. बेल्जियमला अनेक पेनल्टी कॉर्नर मिळाले, मात्र भारतीय खेळाडूंनी त्यांना गोलमध्ये रूपांतरित होऊ दिले नाही.
दुसऱ्या क्वार्टरमध्ये मात्र बेल्जियमने खेळाचे चित्र पूर्णपणे बदलले. अवघ्या दोन मिनिटांच्या कालावधीत दोन गोल करत त्यांनी भारताला मोठा धक्का दिला.
22व्या मिनिटाला रोमन डुवेकोटने गोल करत सामना 1-1 असा बरोबरीत आणला. त्यानंतर लगेचच ह्यूगो लाबूचेरने पेनल्टी कॉर्नरवर गोल करत बेल्जियमला 2-1 अशी आघाडी मिळवून दिली. भारताने मात्र हार मानली नाही. तिसऱ्या क्वार्टरच्या सुरुवातीलाच कर्णधार हरमनप्रीत सिंगने शानदार गोल करत भारताला पुन्हा सामन्यात आणले. त्याच्या गोलमुळे स्कोअर 2-2 असा झाला.
चौथ्या क्वार्टरमध्ये बेल्जियमने पुन्हा एकदा गोल करत 3-2 अशी आघाडी घेतली. सामना भारताच्या हातातून निसटताना दिसत असतानाच हरमनप्रीत सिंगने अखेरच्या क्षणी कमाल केली.
सामना संपायला केवळ 20 सेकंद शिल्लक असताना भारताला पेनल्टी कॉर्नर मिळाला. हरमनप्रीतने या संधीचे सोने करत गोल केला आणि सामना 3-3 असा बरोबरीत आणला. त्यामुळे विजेत्याचा निर्णय पेनल्टी शूटआऊटमध्ये झाला.
पेनल्टी शूटआऊटमध्ये भारताने सुरुवात चांगली केली होती. शिलानंद, दिलप्रीत आणि अभिषेक यांनी सुरुवातीचे प्रयत्न यशस्वी करत भारताला मजबूत स्थितीत पोहोचवले.
मात्र निर्णायक क्षणी कर्णधार हरमनप्रीत सिंग आणि सुखजीत गोल करण्यात अपयशी ठरले. दुसरीकडे बेल्जियमच्या चार खेळाडूंनी यशस्वी प्रयत्न करत संघाला 4-3 असा विजय मिळवून दिला.
51 वर्षांनंतर हॉकी वर्ल्ड कपमध्ये पदक जिंकण्याच्या आशेने मैदानात उतरलेल्या भारतीय संघाने सुरुवातीला आश्वासक कामगिरी केली होती. पहिल्या टप्प्यात भारताने वेल्सचा 3-1 आणि पाकिस्तानचा 5-3 असा पराभव केला होता.
मात्र इंग्लंडविरुद्ध भारताला 2-4 असा पराभव पत्करावा लागला. त्यानंतर दुसऱ्या टप्प्यातही भारतीय संघाला अपेक्षित कामगिरी करता आली नाही. नेदरलँड्सने भारताचा 3-1 असा पराभव केला, तर अर्जेंटिनाकडूनही टीम इंडियाला 3-5 अशी हार स्वीकारावी लागली.
सलग पराभवांमुळे भारताचे उपांत्य फेरी गाठण्याचे स्वप्न भंगले. अखेर बेल्जियमविरुद्धच्या सातव्या स्थानाच्या सामन्यातही पराभव झाल्याने भारतीय पुरुष हॉकी संघाचा हॉकी वर्ल्ड कप 2026 मधील प्रवास आठव्या स्थानावर संपुष्टात आला.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.