श्रीलंकेच्या ऐतिहासिक आर. प्रेमदासा स्टेडियमवर इंग्लंडचा कर्णधार हैरी ब्रूक याने आपल्या बॅटिंगने अक्षरशः हाहाकार माजवला. पाचव्या क्रमांकावर फलंदाजीला आलेल्या ब्रूकने श्रीलंकेच्या गोलंदाजी आक्रमणाच्या चिंधड्या उडवत अवघ्या ५७ चेंडूत आपल्या वनडे कारकिर्दीतील तिसरे शतक पूर्ण केले. ब्रूकच्या या तुफानी खेळीमुळे कोलंबोतील प्रेक्षक अवाक झाले असून क्रिकेट विश्वात या खेळीची मोठी चर्चा रंगली आहे.
हैरी ब्रूकने आपल्या डावाची सुरुवात संथ केली होती. सुरुवातीच्या ३९ चेंडूत त्याने ४६ धावा केल्या होत्या. मात्र, एकदा का त्याचा डोळा स्थिरावला, त्यानंतर त्याने गिअर बदलला आणि खऱ्या अर्थाने तबाही सुरू केली. पुढच्या अवघ्या २७ चेंडूंमध्ये त्याने तब्बल ९० धावा कुटल्या. या दरम्यान त्याने ११ चौकार आणि ९ गगनचुंबी षटकार खेचले. इंग्लंडच्या डावातील शेवटच्या ६९ धावांपैकी ६८ धावा एकट्या ब्रूकने केल्या, तर जो रूट केवळ एक धाव करू शकला.
जेव्हा जॅकब बेथले बाद होऊन माघारी परतला, तेव्हा इंग्लंडला धावगती वाढवण्याची गरज होती. ब्रूकने ही जबाबदारी लीलया पेलली. त्याने अनुभवी फलंदाज जो रूटसोबत मिळून चौथ्या विकेटसाठी १९१ धावांची अभेद्य भागीदारी केली. रूटने एका बाजूने किल्ला लढवत १११ धावा केल्या, तर दुसऱ्या बाजूला ब्रूकने २०६ च्या स्ट्राईक रेटने खेळत ६६ चेंडूत १३६ धावांची नाबाद खेळी साकारली.
हैरी ब्रूकच्या या आक्रमक शतकाच्या जोरावर इंग्लंडने निर्धारित ५० षटकांत ३ बाद ३५७ धावांचा डोंगर उभा केला. जो रूटनेही आपल्या कारकिर्दीतील २० वे वनडे शतक झळकावले. श्रीलंकेचे गोलंदाज ब्रूकसमोर पूर्णपणे हतबल दिसले. मैदानाची प्रत्येक दिशा ब्रूकने आपल्या फटक्यांनी गाजवली आणि श्रीलंकेसमोर विजयासाठी ३५८ धावांचे कठीण आव्हान ठेवले.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.