ICC ODI Cricket World Cup 2023, India vs Pakistan, Hardik Pandya opened up on his act before Imam-ul-Haq Wicket:
शनिवारी वनडे वर्ल्डकप 2023 स्पर्धेत झालेल्या 12 व्या सामन्यात भारताने पाकिस्तानविरुद्ध 7 विकेट्सने विजय मिळवला. अहदमदाबादच्या नरेंद्र मोदी स्टेडियमवर हा सामना झाला. दरम्यान, भारताने हा सामना जिंकला असतानाच या सामन्यादरम्यान हार्दिक पंड्या सोशल मीडियावर ट्रेंड होत होता.
हार्दिकच्या ट्रेंड होण्याचं कारण त्याने इमाम-उल-हकची विकेट घेण्याआधी केलेली कृती होती. आता याबद्दल हार्दिकने प्रतिक्रिया दिली आहे.
झालं असे की पाकिस्तानने पहिली विकेट 8 व्या षटकात अब्दुल्ला शफिकच्या रुपात गमावली होती. त्यानंतर इमाम आणि कर्णधार बाबर आझम त्यांचा डाव सावरत होते.
13 व्या षटकात हार्दिकविरुद्ध दुसऱ्या चेंडूवर इमामने चौकार ठोकला होता. मात्र त्यानंतरच्या चेंडूवर हार्दिकने इमामला चूक करण्यास भाग पाडले. इमाम फटका खेळताना चूकला आणि चेंडू त्याच्या बॅटची कड घेत मागे गेला. त्यावेळी यष्टीरक्षक केएल राहुलने त्याचा झेल घेतला.
मात्र, चर्चा झाली ती हार्दिकने ही विकेट घेण्याआधी केलेल्या कृतीची. हार्दिक 13 व्या षटकातील तिसरा चेंडू टाकण्यापूर्वी चेंडू हातात घेऊन तो तोंडाजवळ नेऊन काहीतरी पुटपुटल्याचे दिसले. त्याचा हा फोटो बराच व्हायरल झाला. त्याच्यावर विविध प्रतिक्रियाही आल्या.
दरम्यान, तो त्यावेळी नक्की काय म्हणत होता, याबद्दल त्याने सामना संपल्यावर ब्रॉडकास्टर स्टार स्पोर्ट्सच्या कार्यक्रमात जतीन सप्रू, गौतम गंभीर आणि इरफान पठाण यांच्याशी बोलताना खुलासा केला.
हार्दिकने सांगितले की 'तेव्हा खरंतर मी स्वत:लाच शिव्या घालत होतो. चांगल्या लेंथवर चेंडू टाकण्यास आणि जास्त प्रयोग न करण्यास सांगत होतो.'
दरम्यान, या सामन्याबद्दल सांगायचे झाल्यास प्रथम फलंदाजी करताना पाकिस्तान संघ 42.5 षटकांमध्ये 191 धावांत सर्वबाद झाला. पाकिस्तानकडून कर्णधार बाबर आझमने सर्वाधिक 50 धावांची खेळी केली. तसेच मोहम्मद रिझवानने 49 धावा केल्या. भारताकडून जसप्रीत बुमराह, मोहम्मद सिराज, हार्दिक पंड्या, कुलदीप यादव आणि रविंद्र जडेजा यांनी प्रत्येकी 2 विकेट्स घेतल्या.
त्यानंतर 192 धावांच्या आव्हानाचा पाठलाग भारताने 30.2 षटकात 3 विकेट्स गमावत पूर्ण केला. भारताकडून कर्णधार रोहित शर्माने सर्वाधिक 86 धावांची खेळी केली. तसेच श्रेयस अय्यरने नाबाद 53 धावा केल्या. पाकिस्तानकडून शाहीन शाह आफ्रिदीने 2 विकेट्स घेतल्या आणि हसन अलीने 1 विकेट घेतली.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
