Weather Update: पहाटे हुडहुडी तर दुपारी उन्हाचा चटका! हिवाळा सुरू, पण उन्हाचा तडाखा कायम, राज्यात हवामानाचा दुहेरी खेळ

पणजी: राज्यात मागील काही दिवसांपासून तापमानात वाढ झाली असून, दुपारच्‍या वेळी पारा ३६ अंशांवर पोहोचत आहे. पुढील चार ते पाच दिवस ही स्थिती कायम राहणार आहे. त्याचवेळी पहाटेच्या थंडीतही वाढ होऊन किमान तापमानात १ ते २ अंशांनी घट होण्याची शक्यता गोवा वेधशाळेचे संचालक नहुष कुलकर्णी यांनी व्यक्त केली आहे.

राज्यात मंगळवारी कमाल ३६.२, तर किमान २२.५ अंश सेल्सिअस तापमानाची नोंद झाली. कमाल तापमान सामान्यपेक्षा १.७ अंशांनी अधिक, तर किमान तापमान १.४ अंशांनी कमी राहिले.

त्यामुळे हिवाळ्यातही नागरिकांना उन्हाचा चटका सहन करावा लागत आहे. दरम्‍यान, मागील दोन ते तीन दिवसांपासून घाट परिसरात पहाटे थंड वारे, दव आणि धुक्याचे प्रमाण वाढले आहे.