गोव्याच्या जलतरणपटू संजना प्रभुगावकरची भारतीय संघात निवड

पणजी ः गोव्याची राष्ट्रीय पदकविजेती जलतरणपटू संजना प्रभुगावकर हिची भारतीय जलतरण संघात निवड झाली आहे. दक्षिण आफ्रिकेत ज्युनियर उच्च कामगिरी शिबिर होईल आणि नंतर तेथेच स्पर्धा होईल, त्यात भारतीय जलतरणपटू सहभागी होतील.

दक्षिण आफ्रिका जलतरण महासंघाच्या सहकार्याने भारतीय जलतरण महासंघाने क्रीडा (Sports) व युवा व्यवहार खात्याच्या सहकार्याने जोहान्सबर्ग येथे 17 मार्च ते 17 एप्रिल या कालावधीत जलतरण शिबिर होईल. 

शिबिर संपल्यानंतर भारतीय ज्युनियर जलतरण संघ पोर्ट एलिझाबेथ येथे 22 एप्रिलपासून सुरू होणाऱ्या जलतरण स्पर्धेत भाग घेईल. दक्षिण आफ्रिका जलतरण दौऱ्यासाठी भारताचा 16 सदस्यीय ज्युनियर संघ निवडण्यात आला आहे. जलतरणपटू मुंबई (Mumbai) येथून रवाना झाले. संघात 15 ते 17 वयोगटातील सहा मुलगे व आठ मुलींचा समावेश आहे. सध्या संजना संयुक्त अरब अमिरातीतील दुबई येथे ॲक्वा नेशन स्पोर्टस अकादमीत प्रदीप कुमार यांच्या मार्गदर्शनाखाली प्रशिक्षण घेत आहे.